De Tsjerne. Jaargang 3

[p. 9]

G.N. Visser:

*

Sa libbe er fierder, iensum en om bar
Oan 'e drank en froulju him bidrinkend.
Hast lokkich wied er, as er wynynskinkend
Jouns iensum siet, de jiergong fan syn kar

Hevende wer yn 't stille ritueel
En moanne joech de wyn jit ealer glânzen.
O dize, pearelskyn, forgreate kânsen
D' ierde to ûntkommen en syn pynlik skeel.

Dan wie der yn dat hûs in keamer oer,
It hillige der hill'gen, dêr't er laette
De froulju dy't er wreed wer fan him staette,
Kronken, brânmarke fan syn somber fjûr....

*

Forlake, húnd, melaetsk,
Sa dwael ik oan de rân
Fan dizze mienskip en der is gjin hân
Dy't mei my fûsket, 'k wie to min karaetsk.

Der wie gjin sit foar my oan libbens dis,
Haw ea ik it gouden oefte preaun?
Hja stegeren my ôf, mar yn myn siele is bleaun
In fjûr dêr't ik it slimste net fan siz.

De swiere wyn, it fruchtfleis net foar ús,
Foar ús de skilen en de bittre koarsten.
Mar siz, hoe komme wy melaetsken thús?
Lâns in inge, tsjustre pas....

dy't jim net oergean doarsten.

[p. 10]

 

*

 

De wrâld net sjen, de wrâld né net to sjen,

 

Dus wenje yn 'e skaden, mar lit dy

 

Biwoekrje net fan dûnkre leaven en

 

Tusken de stammen dochs in plakje frij

 

 

 

Dêrst útsjoch haste op de himel wiid,

 

De kleare kym, dy't altyd dreamen docht

 

En eangje net it gliden fan de tiid

 

Mar skep út siele' dûnkerheit en ljocht

 

 

 

In Fryslân, ealer as der ea bistie,

 

In Fryslân sterk en frij, ûnstjerlik lân,

 

En drúskje net, mar ris dy ta de die,

 

De opdracht is dy jown fan hegerhân,

 

 

 

En sjoch o sjoch hoe't alles helpe sil,

 

De beammen en it rûzjen fan de wyn,

 

De fûgels, dy't er meibringt en it stil

 

Byld fan de fiver mei 't gewaechs deryn.

 

 

 

Alles sil helpe, alles fiert dy ta

 

De drege krêften ta it greate wurk,

 

En yn 'e joun silst earnstige eagen ha,

 

De lannen skôgje en it stille swurk

 

 

 

En it sil wêze as in deugdsume frucht,

 

En it sil wêze swier fan de idé

 

En it sil wêze as in miuw dy't fljucht

 

En as in rûzjend bosk, en as de sé.

(Ut 'e bondel ‘Jolm’, dy't ynkoarten forskynt by útjowerij De Torenlaan to Assen).