De Tsjerne. Jaargang 2

[p. 272]

Jan Wybenga:

Hwa kin jit skriuwe oer de rein
of oer de wyn, dy't oer 'e lânnen strûst,
hwa dreamt jit by it finster fan 'e trein,
dy't floitsjend troch de dize brûst?

Us wrâld is lef en lyts en âld,
de goaden hawwe ús forlitten,
't is better rêstich thús to sitten
as om to doarmjen troch de wrâld!

Hwant draeije fjilden 't each foarby
en slacht yn 't ear it ratteljen fan weinen
dan rûst yn ús, as stadich reinen,
it sleau refrein: mar neat is nij!

De wurden binn' forsliten munten,
bisnoeid en sûnder wearde of glâns,
mar machtich ta de help fan smjunten
dy't stribje nei de greate kâns!

Dochs sil it lêste liet nea klinke,
al binn' ús fersen skimen sûnder bloed. -
Us wurch geëamel mei yn 't lêst forjitten sinke:
Ien skriuwt It Nije Liet út stien en gloed.

[p. 273]

Lette reed

Hja rydt de frjemd-fortiisde paden
dy 't liede nei de âlde skâns.
It hynder skrillet foar de skaden
oer 't weinspoar by de bjirken lâns

en stiet, dêr't har de pôllen dûke
as bange bern tsjin d'ierde oan -
Yn leffe flecht forstienne tûken
lykje al ieuwen lyn forstoarn;

De Tiid skynt wol in kear to nimmen
op dizze grins fan nacht en joun:
hja stiet dêr mids de blanke skimen
fan hwa't hjir earen ried of roun.

Der binne poarten iepen stjitten;
dit toevjen yn it tsjuster is
in lange reis nei ljochte fierten,
dêr't sjen it wisse witten is.

Har siele op 'e wjukken gong,
woe rize as in foarse earn....
mar der wie eat dat skriemend twong
it lêste witten to ûntgean....

[p. 274]

Forgese Reizen

De leffe lietsjes fan de trou
forwaeiden mei in wylde wyn,
doe socht ik myn fortreasting yn
de earmen fan de frjemde frou.

Ik dronk in winternacht yn Praech
de swietens fan Tamara yn
en wie yn Brussel en Berlyn
in sûndich soan út Adams laech.

Wy sykje oerdei in âld gebou,
in hânskrift of in skilderij,
mar op 'e joun forriede wy
ús wiere langstme oan in frou.

En jimmer binn' de wurden lyk,
bistjûrt it wiffe bloed ús hân
en spilet, nei de feale brân,
in gnizend diveltsje de wyk,

En rounom is de Dea presint,
dy skurve swalker yn 'e mist!
Net ien, dy't yn in minske of bist
in freon foar 't hiele libben wint.