De Tsjerne. Jaargang 1

[p. 192]

Inne de Jong:
Kwatrinen fan Omar Khayyám
Ut it Ingelsk fan Edward Fitzgerald

I

Wurd wekker, hwant de moarn fordriuwt de nacht,
Gjin stjerre bliuwt mear op syn hege wacht:
Loaits, hoe 't de greate jager út it east
In strik fan ljocht om de paleistoer slacht!

II

Dreamend, doe 't moarntiid lāns de himel gong,
Hearde ik in stim, dy 't út it wynhūs song:
‘Myn bern, wurd wekker, skink de romer fol,
It libben fljucht, jim bin' sa koart mar jong.’

III

De romer fol! en smyt yn Maitiids fjûr
It wintersk boeteklaed, de tiid is djûr:
Syn earn slacht al de brede wjukken út,
Nimt dy in lyts ein mei en dan is 't oer.

IV

Oan d'ein fan de woastyn, der bloeit de wrâld,
Kom mei yn Maitiids grien en ljocht biwāld,
Hjir is alle ûnderskied en skeel fordwoan
En sultan Mahmuds gloarje lit ûs kâld.

V

Under in beam mei brea en wyn en dy,
Gjin kening is sa ryk, gjin ljurk sa frij,
Ik lēs hwat fersen en dū sjongst en sjongst
En 't wylde gea wurdt paradys foar my.