Trotwaer. Jaargang 34

[p. 105]

Monitoring fan it Ljouwerter managementproses
Piet Hemminga

In mânske advertinsje yn de kranten fan 19 jannewaris 2002 makket dúdlik dat de gemeente Ljouwert, lykas earder al oankundige, de eigen problemen mei it oanlûken fan noch mear amtners tinkt te bestriden. Ljouwert freget ûnder de gâns wat sizzende, yn myn eagen it negative imago fan de stêd nochris befêstigjende kop Wie durft? fjouwer nije meiwurkers (m/f).

It giet yn it foarste plak om in senior adviseur bestjoer en management (oerheidsfinânsjes), dy't him dwaande hâlde sil mei ‘strategiebepaling, innovatie en afwegingen met betrekking tot het gemeentelijk financieel beleid. Een stevige gesprekspartner voor ambtelijk en politiek management. Op termijn in staat om de coördinatie van de sectie financiën op zich te nemen.’ Dat lykje my gjin omskriuwings dy't de Ljouwerter ynwenners fuortendaliks gerêst stelle as it om it foarkommen fan amtlike belestingflaters giet. Ommers de gemeente hat it oer ‘een zich bezig houden met, strategiebepaling [dat is oars krekt in saak fan de ried], een gesprekspartner en iemand die op termijn’ by steat wêze sil om de sektor finânsjes te koördinearjen. Dat is in redaksje dy't allinne de sjerpige oerliskultuer fan it Ljouwerter gemeentehûs nochris befêstiget. En tagelyk is it gjin yllustraasje fan in omslach yn it Ljouwerter tinken, dwaan en litten dy't lang om let in krêftich oanpakken fan de problemen mooglik makket.

De twadde funksjonaris dy't de gemeente oanlûke wol, is in senior adviseur bestjoer en management (organisaasje en ynformaasjebelied), dy't it gemeentebestjoer en management stipet by, op 'e nij, ‘strategiebepaling, innovatie en afwegingen met betrekking tot de ict-portefeuille’. It bepalen fan de strategy en ynnovaasje binne grif tige nedich, mar ik tink dat Ljouwert syn enerzjy mar sette moat yn it hurd en doelmjittich oplossen fan konkrete problemen. In gemeente dy't it hieltiten mar wer oer de strategy hat, liket my aardich yn de war te wêzen, noch ôfsjoen fan de kosten dy't soks meibringt. De Ljouwerter strategy is boppedat ienfâldich te formulearjen: soargje de kommende jierren foar it hurd ferbetterjen fan de kwaliteit fan stêd en gemeente. Dêr binne yn alle gefallen twa dingen foar nedich: de stêd moat in lykwichtiger sosjale opbou fan de befolking krije en de gemeente moat nochteren en mei beide fuotten op de grûn hurd oan it deistich wurk. Dat geëamel oer strategy en management yllustrearret, sa bin ik benaud, feitlik it duorjend gemeentlik tsjinsin om de ko no ris werklik by de hoarnen te pakken.

De tredde funksjonaris, in ynformaasjebehearder foar de sektor middelen fan de tsjinst algemiene saken, sil him yn it foarste plak dwaande hâlde moatte mei ‘de verbetering van de kwaliteit van de werkprocessen, de informatievoorziening en de gegevenshuishou-

[p. 106]

ding van het werkveld belastingen. De operationele aansturing van twee informatiebeheerders en extern personeel behoort tot de taken.’ Dat is in tekst dy't hiel wat taseit, mar ek skoan wat ienfâldiger en helderder kin. Is der nimmen by de gemeente Ljouwert, dy't mei twa waarme fuotten en in frisse holle, in heldere tekst skriuwe kin? Is der op it Ljouwerter stedskantoar werklik nimmen dy't it ‘werkveld’ ris lekker skjin skoffelje wol en alle ûnrant foargoed troch Fryslân Milieu ôffiere lit?

En dan hat Ljouwert ek noch ferlet fan in ynformaasje- en applikaasjebehearder foar ‘document management/workflow management. Hij of zij zal een sleutelrol vervullen in de ontwikkeling en beheer van de informatie-infrastructuur rondom de nieuw in te voeren, centrale gemeentelijke applicaties voor proces-, document- en werkstroommanagement.’ Op 'e nij wurdt it wurd management mar wakker brûkt, en wat net beneamd wurde kin is fansels in proses, mar op sa'n wize set Ljouwert himsels werklik net botte posityf op 'e kaart. Feitlik moat it ommers om in oanpak gean dy't der foar soarget dat net langer allerhanne dokuminten ferdwine en/of fiersten te let of hielendal net beäntwurde wurde. Wat dochs in ferskriklik taalgebrûk yn de stêd dêr't Anne Vondeling dochs net om 'e nocht in stânbyld krigen hat. Mar goed, it hat yndertiid fansels net de gemeente west dy't der foar soarge dat Vondeling op de Nijstêd kommen is.

It muoit my tige, mar in organisaasje dy't net by steat is om yn ienfâldige wurden út te lizzen wêr't it om giet, kin net neitinke. Dizze persoanielsadvertinsje is mei syn krypto-omskriuwings en it yn ien en deselde tekst mar leafst fjirtjin kear brûken fan it neatsizzende wurd ‘management’, op 'e nij in yllustraasje fan de slimme situaasje dêr't de gemeente Ljouwert yn sit. De advertinsje lit ek sjen dat in organisaasje dy't ta de mul of noch djipper yn it ûnleech sit, sels net by steat is om him út dy benearjende posysje te befrijen.

Fan de nije meiwurkers fan de concernstêf wurdt in ‘eigen deskundigheid en een generalistische benadering van vraagstukken gevraagd, waarbij voortdurende monitoring van in- en externe ontwikkelingen van groot belang is’. Dat beart moai en eigentiidsk, mar de brede oanpak en it trochgeand folgjen sille, sa liket my ta, net foldwaande wêze om de Ljouwerter misêre foargoed ta it ferline hearre te litten.

Myn fertrouwen hie grutter west as de Ljouwerter bestjoerders it hân hienen oer in deeglike oplieding en brede fakkennis fan it dwaan en litten fan de oerheid, mei fierders in bliuwend en meilibjend omtinken foar minsken en ûntwikkelingen bûten it gemeentekantoar.

De advertinsje fan de 19^de jannewaris makket ek dúdlik dat de Ljouwerter gemeentlike problemen net ferdwûn binne mei it foargoed nei hûs ta stjoeren fan de eigen bestjoerders. Tagelyk mei men dochs hoopje dat de nije boargemaster, de ried en it nije kolleezje fan B. en W. werklik by steat wêze sille om it sa soarchlik funksjonearjen fan it gemeentlik apparaat lang om let en foargoed op oarder te krijen. Mar dêr is krekt wat mear foar nedich as in ‘voortdurende monitoring van in- en externe ontwikkelingen’!