Trotwaer. Jaargang 25

[p. 190]

Sybout Hartog
Under de seadden

dit lân is sompich, nimmen wit it
de hjerringslynder, takke-ein,
sinkt swier fan wetter & fan rein
in ko wjerkôget & ferjit it

de muskusrôt, dy warbere wrotter,
barget de wâlskant yn 'e sleat
de treurwylch gûlt de woartels bleat
& yn syn teisters sjongt de protter

de ko bûcht nei it gers & fret
dit is har grêf, har bou, har widze
& tusken wier & eineflaach

as yn 'e film - net sjen no! -, traach,
sinkt der in boer fuort yn 'e dridze
al wat der oerbliuwt is syn pet