Trotwaer. Jaargang 24

[p. 174]

[Nummer 5]

Oene Spoelstra

Oarloch

De keningin hat fûgels yn it hier
en praat mei har lakeien oer it waar
hartsje novimber en in drege tiid
foar de regearders fan it nije jier

alles moat oars hat lêst de kening sein
de keningin laket, har holle stiet nei maaie
it giet op beltsjeblazen ta en op skraal bier
dit komt net goed, dit wurdt noch oarloch sa

mei winterjassen oan fol lêbich praat
ministers dy't fjochtsje om de lêste sint
dit wurdt in lange winter kommend jier
it pleatslik nijs wurdt ta in lollypop

de keningin laket, aanst wurdt it wer maaie
giet it op beltsjeblazen ta en op skraal bier
de foetbalploech fan Ljouwert sil keningkraaie
de oarloch wurdt folslein oant op 'e lêste hier

[p. 175]

Sliep

Sliep no mar sacht yn dyn wytwollen dream
dream mar fan sliepen fan ivich en moai
net fan it mes yn dyn rêch net fan skriemen

Nacht tusken ús en gâns dreamen oer doe
sliep no - feroarje dyn hûd ta in tek
tsjin de gisel fan 't yslike libben

Sliep no in libben fan kleare goud
en in do mei in boadskip fan amen
sliep dy ta wetter en driuw fan my ôf
sliep my foar altyd ta swijen