Trotwaer. Jaargang 23

[p. 136]

Jan Dotinga
Foar fjirtich jier

Werklikheid

Dy't hja him droegen hie
Ferskynden achtrisom yn 'e stilte
Ien each ien eangst

Heit tichteby wie fierderôf as ea
Doe't er de namme neamde dy't him
Dierber wie as frou

Syn mûle hie har út 'e wurden helle
Syn mûle loek har by us wei

De keukenstrep wiisde
Yn in donker gat

Jûns ûnder iten slagge in hege
Namme yn wat waarmte

[p. 137]

Dream

Hja riisde oerein ynienen
Wilens naam hja in glimkjen mei en
Treau har skonken oer de planke

Alle ferlamming ferdwûn
Har fuotten bemeaten de keamer
Har hannen laken nei de bern

Yn har nachtpon skôge se it
Nijboude bûthús en fierde mei heit
En ús de opstanning