Trotwaer. Jaargang 22

[p. 254]

Meindert Bylsma
Altsax

foar anneke bron

in út 'e kluten sketten
kromme piip likest
sa'st dêr leist te glânzgjen
yn dyn kiste

mar do bist net
om te glânzgjen en te lizzen
do bist om bespile te wurden
om sels te bespyljen
ik dy
do my
mei syn beiden
it libben
in bytsje heas
in bytsje heimsinnich
wille en fertriet
berêsting en hertstocht
ik swalke mei dy
yn 'e gloppen
fan dy't gjin rjochten ha
ik sliepte mei dy
yn 'e filla's
fan dy't de rjochten meitsje
do makkest my jazzy wekker
as neger
yn myn blanke
do widzest my klassyk yn sliep
as blanke
yn myn neger

in út 'e kluten sketten
kromme piip likest
sa'st dêr leist te glânzgjen
yn dyn kiste
do knypeagest
mei dyn kleppen
ik knypeagje werom