Trotwaer. Jaargang 22

[p. 177]

Tiny Mulder
Frou mei paraplu

hja draacht syn leafde as in paraplu
in oranje paraplu
car il pleut il pleut dans la rue
want it miggelt yn de huzen
want it storeint op it lân
mar de lytse skiere frou
yn it skiere hielal
draacht de oranje paraplu
o nee oranje paraplu draacht frou
en hja glimket as in fearke
tikjend op de hege hakjes
elle chante dans la pluie
hja sjongt syn stimme út de bline muorre
en blaast in tút nei de betonnen wolken
hja laket om de bittere stimmen
en de grize kertieren
hja laket ynfieren
frou mei oranje paraplu
elle danse elle danse bravant la rue
yn de iepenbiere strjitte
giet hja dûnsjend
mei de maskerleaze eagen
mei de ûnneifolgbere oermoed
fan de frou dy't in oranje
paraplu hat

Ut: Oranje Paraplu (1962)

Tinkskrift (1986)

[p. 178]

[p. 179]

Tiny Mulder

Libben

Berne 2 april 1921 yn Beetstersweach.

Opgroeid bûten Fryslân en it Frysk.

As tsiener werom nei Fryslân en dêr it Frysk leard; it lêzen en skriuwen op in jûnskursus.

As bern o sa'n niget oan taal, oan gedichten en ferhalen, dus in soad lêze en ek sels skriuwe: opstellen, ferhaaltsjes, ferskes, mei tsien, alve jier yn in geheimskrift, sels makke op basis fan trije streekjes (in soarte fan spikerskrift, mar dan fan spikers sûnder koppen).

Berop: sjoernalist (1945-1985).

Gysbert Japicxpriis 1986.

Wurk

Pas nei 1945 begûn te publisearjen, earst yn it tydskrift De Tsjerne, nei 1961 ek yn boekfoarm:

-	gedichtebondels, samle yn Tinkskrift (1986);
-	de roman Tin iis (1981) Hollânske oersctting Gevaarlijk ijs (1987);
-	in bondel mei fraachpetearen mei skriuwers Hwer hast it wei? (1971);
-	berneboeken:

It boek foar de fryske bern. Mei Jant Visser-Bakker en mei yllustraasjes fan Diet Huber. 1954.

Juffer Kuorkebier: it lytse drama fan in Dokkumer Dame en oare wiere skiednissen fan minsklike, dierlike, plantaerdige en minerale skepsels, op rym biskreaun. Tekeningen fan Meinte Walta. 1957. 2de pr. 1978.

In kibich span. Lêsboekje foar bern fan 5 oant 10 jier.

Mei printen fan Meinte Walta. 1959. 2e pr. 1981.

De túnkabouter en oare fytmannen. Ferskes; printsjes fan Marijke van Dyk. 1975. - 2de pr. 1980.

Rare dokter Dingdong. Mei printen fan Jerre Hakse. 1981.

Patat spesjaal. Lês-, sjoch- en dochboek. Mei Meindert Bylsma, Douwe Kootstra en Baukje Wytsma. 1985.

- oersettings:

Myn oerpake en ik: learsume en formaeklike foarfallen en ynfallen út de fiskerskeet op Helgolân. Mei tekeningen fan Meinte Walta. 1962.

Oersetting fan James Krüss, Mein Urgrossvater und ich. 1959.

Alice yn wûnderlân. Yllustraasjes fan John Tenniel. 1964. Oersetting fan Lewis Caroll, Alice's Adventures in Wonderland (1865).

De bjusterbaarlike reis fan Menear Prikkeskonk. Printen fan Rudolphe Töpffer. 1980. Oersetting fan Rudolphe Töpffer, Monsieur Cryptogame (1846).

It hoedersliet. In advintsleginde foar bern en grutten fan Max Bolliger. Mei printen fan Stepan Zavrel. Oerset út it Dútsk. 1980.

De bernebrêge. In ferhaal ferteld troch Max Bolliger en yllustreard troch Stepan Zavrel. 1981.

Literêre kritiken foar kranten, tydskriften en de radio.

Frijwilligerswurk: gastlessen op middelskoallen oer de Twadde Wrâldoarloch en de gefolgen dêrfan. De roman Tin iis - Gevaarlijk ijs - jout ynsjoch yn de deistige praktyk fan it ferset yn Fryslân tsjin it Dútske geweld. It ferset wie in saak fan almeast jonge minsken. Lêze dus!