Trotwaer. Jaargang 22

[p. 87]

Josse de Haan

De moude glidet my oer de hûd

de jerk swimt allinne troch de grêft
ik wol in ein wêze en myn hier fet wurde litte
sadat it reinwetter ôfstaat wurdt en fuortglidet

sa soe 'k swimme wolle mei myn eigenskepen jerk
yn de strjitten mei bemoude lju troch McDonalds

De wurden hawwe fekânsje nedich

ik wol de wurden befrije út de teksten
fan reklame
fan polityk
fan bibels
fan kranten
fan poëzij
ik wol mei harren fekânsje hâlde yn in tintsje
mei harren frije op Skylge bygelyks
op de Boskplaat en it amelannerdún
troch sâlt wetter himmelje litte
sadat de skerpe angels foar in twadde libben
- de striid tsjin de útsliten kaaisgatten -
stal krije en nije kombinaasjes gearstalle

[p. 88]

Nachtkonsert by ljochtmoanne

wite protters befykje harren fluitsjes
reade teannen op 'e snaren fan in fioele

twa reagebollen skowe stadich hân yn hân
boppe de rychjes skedels yn 'e goaten fan de stêd

boatsjes wibelje nerveus op 't groeiend tij
los wachtsjend oan de romme dukdalfstrûpen

en heech derboppe ljochtet it elektroanysk boerd
twa-nul foar de skonken fan marlène blikfangers

Iloyds fersekeringen yn ear en each en noas

[p. 89]

Tango

foar m.

klonken lizze ús liven
op 'e loer
en frije ús stadich
nei de oare kant

want:

sjochst my oan

stjerre wy in amerij

eagen wurde knikkerts

sjochdoaskes en toverkikers

want:

ûntkymjend sykheljen

flammet de stiennen hannen

yn in fingertango

rûne hoeken