Trotwaer. Jaargang 20

[p. 202]

Margryt Poortstra

oantinken

te fier foar stim
lûk ik dy soms foar eagen
dyn dûnkere stal foar it rút
dyn rêch de keamer yn

foarsichtich plôkje ik
de plúskes fan dyn klean
en lústerje ferduldich
asto wer prottelst
op de hurde wyn

deselde as dy't no
om it lege hûs gûlt

ik sko de kleden
tusken âlde bylden

de nacht is blyn

[p. 203]

oanstriid

wy moetsje elkoar
yn in drokke stêd
of better
eefkes spegelje ús eagen

hier
falt yn rjochte slieren
oer meager wyt

kom tusken myn hannen
ik sil appels waarmje
op dyn wangen
myn fingers litte
dyn hier wer flinterje
as likefolle simmer

it winkelrút is leech
har hege skouders
rinne anonym
of lytser noch
tusken de oaren

ik wol har roppe
mar wit net hoe't se hyt