Trotwaer. Jaargang 18

[p. 183]

Meindert Bylsma
Cochem
(welt und breit gemütlichkeit)

1.

dêr sit ik dan
by kreas waar
op in bankje
yn Cochem
oan 'e Moezel
de Moezel is moai
en de wyngerds
dy't tsjin 'e hellingen lizze
ik sil der gjin kwea wurd fan sizze

de Moselpromenade
is bemanne
en befroule
deugdlik lang
en lossinnich koart
bejurke of bebroeke
alles wat minsklik is
kin ik fan myn bankje ôf berûke

ik soe
in Rundfahrt meitsje kinne
in kastiel besjen
in berch beklimme
in flesse wyn keapje
of in Bockwurst
mei in Brötchen
se hawwe hjirre sels patat
mei sûnder en mei mei
en oeral hawwe se foar my

[p. 184]

 

noch wol ein Zimmer frei

 

 

 

ek wurdt der

 

foar my flagge

 

op syn Dútsk

 

syn Ingelsk

 

syn Frânsk

 

syn Belgysk

 

syn Amerikaansk

 

se ha der sels foar soarge

 

dat de Nederlânske flagge net ûntbrekt

 

ik mis lykwols de pompeblêden

 

en dat is it him no krekt

 

Cochem is gjin Kimswert

 

de Moezel gjin Harnzerfeart

 

in berch is gjin seedyk

 

haw ik ien berch oerwûn

 

in oaren jout my gjin ûntwyk

2.

efterbaks glydzje
de bergen op my ta
mar ek fan foaren
en fan 'e sydkanten

de hellingen
hawwe har fersein
oan 'e druvebeammen
as soldaten yn fredestiid
ferklearje se my de oarloch

ik fiel my ûnheimisch
as in poerbêste klaaijerappel
tusken suterige druven
yn in fierstente djip board

stadich mar sekuer lykwols

[p. 185]

 

sille de druven rypje

 

 

 

yn 'e nacht fan it wynfeest

 

sille se har rôlje litte

 

en ik sil fersûpe

 

yn in lawine fan Moezelwyn

 

 

 

ik moat hjirwei

 

werom nei seewyn

3.

sitte jo
yn in dal
en tinke jo
de bergen
ta plumpuddingen
mei weake ûnderstellen
sis mar sloppe ankels
dêr 't se elk stuit
trochhinne gean kinne
dan hawwe jo
lêst fan berchfreze

it is faaks better
om takom jier
jo tinte op te slaan
tusken Wierum en Nes

wa wit is waadrinnen
wat foar jo