Trotwaer. Jaargang 18

[p. 167]

Eppie Dam
De bline

Hoewol't it maityd wie,
bin ik berne by de hjerst.
De moarns om 9 oere wie it
dizich, sa dôf
ha my de eagen west,
fan jongs ôf oan
sa swier bebolstere
dat it my
in riedsel wie hoe-
dat der ljocht te heinen
foel as wie it rein.

Sûnder doel foar eagen
haw ik my de tiid troch-
slein, mei de blinestôk
de rânen fan 't bestean betaastend,
heal ûnwittend, heal fermoedzjend
dat it wêzen my ûntkaam.

Oant de dei
dat ik it barsten hearde
fan kastanjes út har skyl,
as knapte der in stien.
Doe binne my de eagen iepengien
en stapte ik it ljocht yn
út 'e skerte fan eachslid wei:
myn twadde berte.