Trotwaer. Jaargang 18

[p. 56]

Jelle Kaspersma

Alkali

alkali
bitend stof
o skiere flok fan dit lân
dyn moudestoarmen
ha de minsken
in bittere wierheid
yn 'e eagen wreaun

yn grize wolken
stowe dreamen
fan rike rispingen
fan koel helder wetter
witwersanne

mara
is hjir mear
as in bibels wurd
bonkerakken
njonken in neakene poel

myn ûntstutsen eagen
boppe de bûsdoek
sykje nei tekens
fan libben

[p. 57]

Stien

dellein troch iis
fan in lange winter efterlitten
stien
fertoant him
yn de hurde pracht
fan swarte flint

ik sykje dy op
hifkje dyn wicht
op 'e hân
tongerstien
fjoermakker
hjir leit de hurde glâns
fan swarte flint

en nim dy mei
reizgest fan rêstplak nei rêstplak
út ierde's ynderlik wei
nei iis nei wetter nei strân
dan dizze finsterbank yn
dyn hurde klank
fan swarte flint