Trotwaer. Jaargang 18

[p. 4]

Eppie Dam
Long-drink

Augustusnacht. De liguster slacht flam
yn it skynsel fan ús houtfjoer op 'e tún.
It gloarjend blêdte ken de eangstme net,
yn brún en swart ferskronfeljend, fertard
te wurden, lykas Mozes' toarnbeibeam
de tiid hân hat te baarnen
mei behâld fan langstme.

Krekt sasto dêr sitst,
it antlit skitterjend
bestindich yn 'e dûns fan wevend ljocht:
noch jong, noch âld - sa ûnoantaastber
foar de tiid te wêzen!

Mar ûndertusken,
de fiksje raant ús ûnder hannen wei
as tinne blokjes iis
dy't hieltyd heger klinke
yn ús long-drink-glêzen.