Trotwaer. Jaargang 18

[p. 2]

[Nummer 1]

R.R.R. van der Leest

Keunst en wurklikheid

rjocht de rêch de knibbels prangd
siet se yn de midnacht bar
faam dy't har wol sette woe
nei it triuwkjen fan myn hân

oer de flier fertrape klean
ûnder tinne bêzje slip
twange hûd dy't delstrûpt is
om in hakke stykjen bliuwt

wat haw ik oan poëzij
fersebondels by de rûs
no't sy 't rôze boekje mei
de twa blêden iepenslacht

nee gjin dichterlik geskyt
dat is mar sabeare guod
echtens leit hjir no by har
tusken skonken sa't ik doch

[p. 3]

Winskdream

as ik in âldkeardel bin
wol ik allegear dingen dwaan
dy't ik út fatsoen fersomme haw
ik sil midden ûnder de foarstelling rachelje
ik sil op 'e tafel stean gean
de boks tsjin it plafond hâlde
en de boppebuorlju op it lûdst
de njoggende fan beethoven hearre litte
ik sil neist it urinoir mige
ik sil de bus stopje litte
as ik der net út hoech
ik sil elkenien dy't my it paad freget
de ferkearde kant út stjoere
ik sil âlde wyfkes helpe by it oerstekken
en midden op 'e dyk stean litte
ik sil de balonnen fan lytse bern lek prippe
ik sil de froulju yn 'e billen knipe
en ik sil wille hawwe as se sizze
tink derom dêr hast dy fize fint
ja ik wol hearlik ûnbeskoft wêze
as ik in âldkeardel bin