Trotwaer. Jaargang 17

[p. 346]

R.R.R. van der Leest

Hegeliaansk aventoer

de konjak nipt net oan de man
dy't leunt oer it appartemint
fan it balkon fan de râne
en sjocht hoe't in lantearnepeal
tsjin in bal stuitet wylst in stomboat
út de piip fan in rookplom komt
de wyn yn in flagge wappert
en it strân op syn frou leit

[p. 347]

Somperidders kweeste

farwol myn lea farwol
ik moat fan dy fandinne
sa sei in ridder jong
en trêde sûnder omsjen op
jambyske fuotten dêrhinne
beseard wie er fan binnen
fan bûten net sa bot

hantwurkjend yn it slot
bleau hja sûnttiid allinne
ferbiidzjend sine komst
en hja hja naaide dipper troch
mei krússtek op it linnen
beseard wie hja fan binnen
fan bûten net sa bot

hy bidde en hy focht
ûnder de wrede sinne
tsjin moar en oar soart folk
en gapske wûnen nei in skoft
koe er mei moed ferwinne
beseard wie er fan binnen
fan bûten net sa bot

oan ein kaam er werom
nei fiifris trije jierren
doe stoarren beide stom
yn 't toarre antlit en elk tocht
joech ik dêrfoar myn libben
beseard bin ik fan binnen
fan bûten net sa bot