Trotwaer. Jaargang 17

[p. 315]

R.R.R. van der Leest

Famke

bibeth kaam oan de doar om in hockeystick te lienen
gjin bern mear en noch net in jonge frou
ynmoedich stie se foar de drompel
mei grutte eagen dêr't de spyldriuw net yn fonke
mar 't gleonjen fan in djipper koarts
as by in farrende dy't oan de reling
langjend nei de iepen kimen sjocht
en tagelyk de pine fielt om de ferlitten haven
dy't nea wer oanlein wurdt troch boaten fan de jeugd
bibeth kaam oan de doar om in hockeystick te lienen

[p. 316]

As yn in film

noch ien kear fereale te wêzen
net sa'n bytsje oanstutsen
mar lôgjend
in tsjustere flam tsjin de kust fan azuer

en 't sêfte dúnjen fan in lauwe see
dy't starichoan dit hert begjint te slypjen
ta koraal
de opalen om har hals

en dan te sjen hoe't se oandriuwen komt
op in streekjese lailo dat is luchtbêd
wylst fansiden in jonkje
de selsfongen inketfisk
binnenste bûten strûpt

as yn in film

en elk oan in kant fan it paad te sitten
-wêrwei -ingelân
-wêrmei -boat en trein
-wurch -nee
-slieptrein -nee
-dus al wurch -ja
wjerklang fan it subtropysk klimaat

nei monako te rinnen
paleis kasino en jachten benefter te litten
stil stean
by in orkest fan meganyske negerpopkes

as yn in film

[p. 317]

 

en in kapel te besykjen

 

dêr't in non tasjit

 

om mei rok en doek

 

keine bleate skonken te bedekken

 

en in nimbus fan blûn hier

 

 

 

ûnder blaumoandeiskyn

 

yn it iepenloftteater

 

oan de midsimmernachtdream te ûntstiigjen

 

twahûndert treden omheech

 

 

 

en op it koele ûnbesmette lekken te lizzen

 

-ik hâld fan dy

 

en it wurd net te leauwen

 

mar skimpen fan ljocht

 

 

 

as yn in film