Trotwaer. Jaargang 17

[p. 104]

Jelle Kaspersma

Boppe sompelân...

boppe sompelân oan thijssengrêft
sirkelje hoanskrobbers
sinne sûget harren
thermysk omheech

tusken rusken
stiet de reager ree
magnetyske krêft
yn punte fan snaffel

fisk lit him spitse
sûnder ferwar
weaget er troch kielsgat
troch strôt reager yn

hiel heech no
sirkelje de fjouwer tsjûgen
sûge fan sinne

[p. 105]

Strân

is kâlder dan snie
en hurder dan iis
by it winter

ûnferwachts it each fan in stien
in geef bewarre see-egel
getten yn flint

troch myn triennen hinne
glimket it strân

yn nullen fan stosân
ferweget eastewyn
tusken hjir
en sinne

[p. 106]

Tsien

de skutter
it lichem stilset
knibbels op slot
gewear op fingers
eagen rêst
siken ynholden
swarte sirkel om swart doel
finger
stadich efterút

dan
suver lûdleas
brekt skot spanning
kûgel karton
en
swart fan njoggen
omsirkelet
dit gat

tsien

[p. 107]

Beam yn 'e hjerst

syn lêste hjerstige grien
giet blêd foar blêd
nei ûnderen

stadich
krollet er
de tûken op
nei de stamme

syn spruten
de takomst
hoedet er
haadman fan in folk

gearballe stiet er
wach foar stoarm
en froast