Trotwaer. Jaargang 16

[p. 334]

Geart van der Zwaag
Fryske aquatrinen¹⁾

I

do hast al tiden yn dit wetter stoarre
in goudfiskglim mocht dy net ienris barre
de pompeblêden driuwe op einekroas
jou dy oerein dan kin wy fierder farre

1) Ut it skipsregister fan de ‘Wynharp’

[p. 335]

II

wat driuwt dy dochs, wat hat dit farren yn
wêr hâldst op oan, de heger wâl miskyn
sa praten wy en stieken it lijswurd djipper
en leine even skerper oan 'e wyn

[p. 336]

III

as ik dy wie ik soe der goed om tinke
en syl net al te djip yn dizze slinke
ik soe yn 't soaitsje lâns as ik dy wie
in swurd kin tille en in skipke sinke

[p. 337]

IV

do hast de snaren spand ta 't avontoer
lykme allinne dizze wrâldsee oer
Eolus wynt yn 't want, weint troch de stage
do sjongst fan Eeltsje in liet en stietst oan 't roer