Trotwaer. Jaargang 16

[p. 319]

Ties Roorda

Anna I

It testbyld fjouwer oere middeis
lûkt aloan har oanwêzen fuort
oant yn in sûndfloed fan bylden
gewillich har tiid ûndergiet.

De nijslêzer lêst har earnstich
it skyngehiel fan wat hjit
de aktualiteit in skrokken
komt werklikheid oer Anna hinne.

Foar de spegel dost se har op
noch yn it fel fan lady Christel
skeanbillet Anna lyksa en
wachtet yn har wrak ledikant oant.

[p. 320]

Anna II

In kiste mei tritich winters oan
brieven hat se by 't jiskefet set
kâldwei har útlibbe ryk ôfskoattele,
de frjemde jiskemanlju útswaait.

Op 'e siden dêr't leafde omspoeke
werskriuwt se har deiboeken en
leaut op in dei dat de feiten sa
wol passé by har achterlitten tiid.

It libbet lichter, hâldt Anne út,
har wenromte pleistere se wyt,
in grêf dêr't se suver dútsk har
de lêst fan it oantinken útwisket.

[p. 321]

Anna III

Sjoch Anna, de lupine bloeit
alteast ast it sjochst, sjochst
dat de lupine bloeit, sjoch datste
sjochst dat de lupine bloeit ensfh.

Anna is út Anna, sjocht net mear
as televyzjebylden mei wat pinkster
blommen dy't skier har tinken
dogge oan de pinksterblommen doe.

Se wit it net mear hoe't it wie
sa lang ferlyn doe't se Anna wie
Ik bin 't fergetten, mar do seist
dat it noch hieltiten bestiet, dàt.