Trotwaer. Jaargang 16

[p. 316]

Wilco Berga

Seefeest

swiid en rûnom ferljochte
yn 'e rein ferweecht
myn fartúch
oer 'e marren
mei de falske klanken en
lûdroftich net te sêdzjen feest
fan bliere trommelslaggers
sjonge froulju yn it rom
it lied fan har opteine skonken

roeie slaven moedsum
yn it swit
oergeunstich wiist de stjoerman
nei myn stanbyld
yn 'e haven lizze fammen
op 'e rêch en harkje
nei it wetter nei de lûden
oan har siden reizgje skippen ôf
mei musikanten seelju yn 'e nacht

[p. 317]

Kommen

ik wachtsje yn it skaad
fan skippen in momint
it tiidrek fan har kommen
mei de boaten
yn it sok har byld

in etmel reizget hja
mei streamen om 'e wâld
en folje ik de tiid mei skoften
fan oanhâldend blêdzjen
yn tabellen fan har tij

de folle kaaien wachtsjend
folk en mânlju raze
stiet har namme yn 'e seilen
skreaun op doek
mei gleone printen fan har mûle

[p. 318]

Lofliet

toer fan waarmens
yn har golle skonken
hoed mei lok

de hazzen skrikke
yn har hier

en yn har nacht
ha ik hoeden
as in skroar
besocht
de stikken fan har rôk
oanien te riuwen
ta in timpel
fan it ljocht