Trotwaer. Jaargang 15

[p. 34]

Eeltsje Hettinga

It spoar

Alle bûnte stêden fan Europa troch mei
de wanhoop wat myn driuw dan mear is
as de trein dy't ik einleas yn en útstap
alle bûnte stêden fan Europa troch mei
de waan en de drift fan dream dat ik dy earne
by't libben betraapje noch nei de âlde foarmen
fan de frou sa't ik bern dy foar eagen ha
mar by alles wat ik socht en besocht
ferwikselesto hurd fan spoar myn doarmjen

elke frou is krêbe en kiste tagelyk
ik klim yn har op en gean yn har del
alle bûnte stêden fan Europa troch en
oeral fiel ik my wer oan har byld bekocht

[p. 35]

Antwerpen

Do wat bisto mear as de fisk
yn de wetterfal fan ljocht
hjoed yn de oktoberstrjitten
fan myn wyt fersulvere rivierstêd

alhielal bern yn 't sulverklinkende ljocht
folgje ik dy ûnberoaide bliid
as eartiids it griene mezykkorps en leau
it blinkende Skeldewetter bylâns

dat 'k oars net eingje as de lytse nacht
mezyk yn 't begjin fan dyn skerte
no't de sinne sniewyt op 'e kop stiet
't oktoberljocht myn pinkter opropt

mar fûgels boppe galmjende klokkehûzen
fleane de linen fan dyn lichem fisk
hjerst is in breklike dream en skimer
ferkleuret stadichwei myn wûnderstêd