Trotwaer. Jaargang 13

[p. 183]

geart van der meer
lang ljocht

't is waarm. gerdinen weevje hinne en wer
yn 't lije wyntsje. lang ljocht gliidt hoeden
de muorre op, fan 'e flier. fier, al fierder

klapwjokket in flecht dowen, 't fjild oer, en
in houdo rûkûkoeket monotoan.
twa fytsers op fjurren speaken stjoere

noch lange takomst yn. de doar is oan -
en kraandrip knipt fan 't lêste triedsje tiid de
lêste raffels ôf. hjoed sil 'k stjerre, of moarn.

wat stjert mij oan? wat stjert mij ôf? 'k wit de
jierren noch datsto der wiest, en ik licht
foarútsjen woe, nei blauwe dagen, wite

nachten, ferkuoljende moarnen. lykwicht.
mar alles moat slite. lang skiede fjoer
en wyn mij fan dij. myn lea bin swier. ticht,

[p. 184]

 

o, tichtbij is de ein. aanst is alles oer

 

fan wat earst hoopfol komme moast, en kaam,

 

en kommen wie, en net mear is. en foar

 

 

 

mij leit neat mear, en - amper noch in skaad -

 

leit achter mij 't ferline, in plankje

 

mei wat snústrige souvenirs, in laad

 

 

 

mei wat knûklige fotoos. gjin sprankje

 

fiel ik mear fan wat doe yn mij brânde,

 

en faak waarme, en ek skroeide. harkje

 

 

 

kin ik nei myn ûnthâld, mar fersâne

 

is de reade bloedstream. blau tekenje

 

ieren op myn hân, dy't oan dyn râne,

 

 

 

dyn oerflak, socht hat de kearn. 'k wegere

 

(te faak of: meast?) yn dyn djipten dij te

 

sykjen. djipseedûker yn legere

[p. 185]

 

ûndersee hie 'k wêze kind, om mij te

 

widzjen op dyn draachstream, te ferwûnjen

 

mei hieljend bloed oan dyn koaraal, dij te

 

 

 

leavjen as it ljeppend ljocht yn wûndre

 

kristallen. mar, l^andier, oerflakswimmer,

 

gjin aan hie 'k fan it streamen dêr ûnder.

 

 

 

ik socht, en fûn, mijsels, in ferliezer -

 

dochs wit ik noch: doe - lang ljocht glied hoeden

 

de muorre op, fan 'e flier. fier, al fierder

 

 

 

klapwjokke in flecht dowen 't fjild oer en

 

in houdo rûkûkoeke monotoan

 

twa fytsers op fjurren speaken stjoerden

 

 

 

in lange takomst yn ik wie it sân

 

dat waait sa't de wyn it waait do it sân

 

dat waait sa't de wyn it waait wij it sân