Trotwaer. Jaargang 13

[p. 10]

Eppie Dam
In prachtich doelpunt

De fuotballer dy't ien menút foar tiid syn ploech mei in skoandere kopbal op 1-1 sette, tjirge him fan blidens. Mei de beide earmen rjocht omheech en de mûle op it wiidst iepen sprong er trije kear op en del en raasde høhø hø Doe seach er fan alle kanten syn ploechmaten op him ôfstowen. Hy sette de sokken deryn, ûntwiek rugby-eftich de meanende earmen en stiek dwers it fjild oer. Mei in behindige sprong kaam er op de sintelbaan telâne. Hy draafde it hurdrinderspaad del en swaaide nei it publyk dat dûnse en jûchheide. Doe't er in healbaan rûn hie weau er de minsken ta en ferdwûn troch de yngong fan it stadion, mei in barst smiet er it túnhek iepen en fleach it hôf yn. yn it skaad fan de beammen seach er syn mem sitten yn de âlde reiden stoel, dat hja fiif jier nei har dea ek hjir noch siet te breidzjen die him gjin nij. hymjend fleach er it âldminske om de hals en sei it stiet ien ien mem. hja glimke sûnder op te sjen fan har breidzjen en sei moai jonge en hasto it doelpunt makke? hy lake lûd ja mem mei in kopbal in prachtich doelpunt. hy kaam oerein en seach nei de fruchtbeammen dy't rûzen yn de waarme wyn. doe frege er om in bal. syn mem sei dat se noch net allegear ryp wiene. de beam dêr't er no krekt ûnder stie dêr mocht er wol ien fan ha. de oaren moast er foarearst ôfbliuwe. hy skodde de leech-hingjende tûke hoeden hinne en wer doe wat fûler. de rypste bal kaam del en stuite trijeris op de grûn. hy sei se binne moai rûn mem en knypte wyld yn it waarme lear. doe smiet er de bal foar him út yn it gers. hy fleach der efteroan en boarte mantsjepassearen mei de beammen. hieltyd as er ien foarby wie rôp er lûd ah of ah ah. Hy hie it hiele hôf troch west doe't er op de knibbels delfoel foar syn mem. hy krige har by de earm beet en sei no moat mem it net ophingje wit mem noch wol? hja kaam glimkjend oerein skuorde de priemmen út de stekken en spande har breidzjen tusken twa beammen. wylst er njoggen stappen fan it net ôf die en dêr in breipriem yn de modder stiek postearre syn mem har wiidskonkich de hannen fier útinoar foar it net. hy lei de bal njonken de priem die trije stappen efterút en skeat. hja gibele sloech mei hannen en fuotten mar de bal lei al efter har yn it net. hy fernuvere him omraak lake as in lyts bern en makke sprongen hieltyd as er de bal hy har lâns sûzje liet. doe skeat er te heech fierstente heech. de bal saaide mei in lange bôge oer it net hinne en bedarre yn it wetter fan de ø fraat. hja gûlde mei lange úthalen fan nocht en soe fuort om de bal út de feart te krijen. mar hy raasde ho mar ik haw al in nijen-ien. mei

[p. 11]

in spronkje koe er in oare bal fan in tûke plôkje. hja rôp nee nee dy net dy is net ryp dy is as in balflint sa hurd. hy hearde it net lei de bal njonken de priem skeat hurd. hja soe krekt op him ta om him it ding ôf te krijen mar de sûzjende bal batste har lyk yn it gesicht, hja klapte efteroer tsjin it net oan keatseballe doe likehurd werom en bleau foaroer langút yn it gers lizzen. doe't er by har del knibbele en har de hân op de holle lei skeat hja as de wearlich oerein. hja krige him by it nekfel en skopte him ta it hôf út wylst hja him noch neiraasde ik hie it goed sein net dy net dy is net ryp wachtsje mar jonkje do silst dyn master thúsfine. doe smiet hja it túnhek ticht en postearre har by de yngong fan it hôf. har breipriemmen blikkeren yn it ljocht fan de sinne. Hy rûn it fjild wer op. De minsken jûchheiden noch om it doelpunt. De bal lei klear op de stip. In heale menút sawat wie er yn de sûs, hy frege him ôf wêr't er wie. Doe, it wie tsien sekonden foar tiid, rûgele him de bal foar de fuotten. Yn de fierte hong it net, it grimele him foar de eagen. Mei behindige bewegings passearde er syn maten en sette rjocht op eigen doel ôf. Hy skeat. De doelman ferroerde him net en de bal sylde sierlik yn de touwen. In prachtich doelpunt. De doelman fleach op him ta en ferkocht him in trewinkel. Hy rekke ûnder fuotten. Syn maten sloegen him mei de fûsten tsjin de holle, op it boarst, skopten him yn it krús. Doe, tsienresom, gyngen hja op him stean te dûnsjen. De bal kaam net wer op de stip. De ploegen gyngen it fjild ôf. Hy bleau lizzen, dea yn it strafskopgebiet. Fan it moartsjende publyk krige er in stien fan sitkjessens en bierblikjes. Op it elektroanysk scoreboerd gyngen de lampkes fan 1-2 út. Mar de duvel yn de dug-out lake ûnder dúmkes wei.