Trotwaer. Jaargang 11

[p. 369]

Bartle Laverman
M S Fase 1

1.
dyn hân streaket har earm
nou't hja gûlt
witst ek net hwat to sizzen
nou't de grinzen sa fêstlein binne

it is dy wer foarby gien
hwat is it dit to witten
fan feilige ôfstân
sjochst har triennen

fan hjoed ôf
mjitte wy de tiid

[p. 370]

 

2.

 

nije patroanen

 

wy keapje in stimopnimmer

 

wy lêze de krante yn

 

litte har ús praetsjes hearre

 

 

 

de yllúzje fan it der noch by hearren

 

der is ommers in kapferbod hjirre

 

en se kin der ek wol 60 mei wurde

 

en as je autoride bin je dochs ek net hieltiten bang?

 

 

 

welné jonges

 

apeltaert mei bearenburch

[p. 371]

 

3.

 

se sjocht elke dei hwat mear

 

it giet moai foarút

 

sizze wy fleurich tsjininoar

 

ús bernehân sa gau fol

 

 

 

de ynjeksjes bolje har

 

it lizzen forpuddingt har sinen

 

de gotspe dat je optimistysk

 

fan dizze sykte wurde

 

 

 

dus geane wy út iten

[p. 372]

 

4.

 

hij wol nou gau it hûs klear ha

 

tinkt oan liften, rolstoeldrompels

 

timmert oerdeis

 

drinkt thé by ús

 

17.43 trein

 

en komt mei de groeten werom

 

dan ite wy

 

drinke thé en boarrelje

 

 

 

hoefolle wiken wol net sa

 

soms moat ik nei har ta

 

om to sjen oft se wol bistlet

 

 

 

se bistiet

[p. 373]

 

5.

 

en as se wer thús komt

 

geane wy wer gewoan mei har fierder

 

plannen foar de hjerst al ré

 

krekt dwaen oft der neat is

 

 

 

krekt dwaen oft der ivichheit is

 

krekt dwaen oft Tafal hjir noch hearsket

 

dounsje mei de dea

 

Ik tútsje har lippen

 

 

 

moaije tiden yn baffelt

 

sunny baffelt!

 

 

 

21-8-1979

[p. 374]

Tichelwurk
Meidielings fan de redaksje

1. Mei yngong fan nû 1980-1 sil de redaksje fan Trotwaer yn de redaksjonele stikken de steatestavering-1980 brûke. Fansels hâldt eltse skriuw(st)er it frij om yn Trotwaer in oare stavering as de steatestavering to brûken, likefolle oft dat de stavering-1945 of in eigen oanrette stavering is. Staveringstwang kin ommers allinnich mar jilde foar amtners en yn it ûnderwiis. De stavering fan de namme TROTWAER sil net oanpast wurde, omt it om in namme giet.

2. Mei yngong fan 1.1.1980 is Goaitsen van der Vliet redaksjeskriuwer. Syn adres is: Rembrandtlaan 312 yn Enschede.

It lêste nûmer fan Trotwaer (1979-5) hawwe inkelde réaksjes op west yn forbân mei it bisprek troch Eppie Dam oer MOARKE fan frou A. Meester-De Vries. Sa forwyt Tiny Mulder yn it Frysk Deiblêd ús ûnminsklikheit, omt yn itselde nûmer in freonlik fraechpetear mei de skriuwster fan MOARKE stiet. Hja wol der op út, dat wy frou Meester de groun ynwâdzje wolle, nei har earst blier taglimke to hawwen.

Soks hat fansels nea ús bidoeling west.

Doe't wy fan Pieter Breuker dit fraechpetear krigen (bigjin 1979) foel it ús hwat ôf: wy misten binammen in hwat djipper dollen yn rol, funksje en karakter fan it goede berneboek. Wy hawwe it doe dochs oannommen op bitingst dat it biselskippe wurde soe fan bygelyks in bisprek fan MOARKE sels troch in bisprekker anno 1979. Dat is dus Eppie Dam wurden, en it is in frijhwat negatyf bisprek wurden. Dêr wurde arguminten foar jown en der kin derom oer diskusearre wurde Sa ienfâldich leit dat. De redaksje hie sadwaende foar om in oanfolling to jaen op it ûnderwurp dat ek yn it fraechpetear sels oansnijd wie: it berneboek. It stik fan Teije Brattinga stie hjir alhiel los fan, omt dat is ús letter op eigen manneboet tastjûrd. Dat is dus de achtergroun fan Trotwaer 1979-5.

Lykwols, soks wisten de lêzers net. Oft frou Meester sels fan de gong fan saken op 'e hichte wie, witte wy net; wy ha wol alles sa mei Pieter Breuker trochpraet

Wy, as redaksje, moatte no tajaen dat wy, doe't wy, nei it útkommen fan Trotwaer, sels LÊZERS wurden wiene, biseften dat ien en oar minder aerdich foar de hearen kommen wie en binammen minder aerdich foar frou Meester, dy't - hoe kin it hast ek oars - dit Trotwaernûmer as in foech earbitoan oan harsels sjoen hawwe sil

[p. 375]

Wy jowe earlik ta: wy hawwe ús as redaksje net genôch forpleatst yn it tinken fan de lêzers, en fral fan frou Meester. Wy wienen tofolle dwaende mei ús eigen plannen oangeande de gearstalling fan dit nûmer. It nat gjin doel om to bearen dat wy gjin flater op it PERSOANLIKE flak makke ha. Wy sizze rjochtút: dat hawwe wy en dat muoit ús. Wy hawwe dit nûmer net dúdlikernoch presintearre en biargumintearre.

SAEKLIK bisjoen, oan de oare kant, sjogge wy gjin reden ta spyt: de opmerkings fan Eppie Dam oer MOARKE lykje ús de muoite fan in diskusje wurdich. Faeks dat dy noch komt. Wy kinne no al fêst sizze dat ûnder oaren in artikel op kommende wei is oer it berneboek fan Eppie Dam.