Trotwaer. Jaargang 7

[p. 85]

R.R. van der Leest
Fersen

Oanpassing

ik ha ek spoarbylzen yn myn tún lein
ik ha ek myn burd stean litten
ik ha ek in sitkûle yn myn keamer makke
ik ha ek in iepen hurd mitsele
ik ha ek nei de wintersport west
ik ha ek in bar mei krukjes timmere
ik ha ek in barbecue efterhûs boud
ik ha ek op de trimbaen roun
ik ha ek affysjes oan de muorren hinge
ik ha ek oan in quiz meidien
ik ha ek in kleure ty kocht

ik bigjin al aerdich wy to wurden

[p. 86]

Gearkomste

alles goed
sûnder sûker
ik swarte
kom minsken wy moatte bigjinne
blabla bloblo bloebloe
wy binne net ta in útdragene saek kommen
mar it hat in fruchtbere útwikseling fan gedachten west
o ja
wy moatte noch in datum foar de oare kear fêststelle
hwat tinkt jim fan freed de achttjinde
dou net
dou ek net
in wike letter kin dat
woansdei de trijentweintichste
moai
dan winskje ik jim allegearre wol thús
blabla bloblo bloe bloe

[p. 87]

Autoleaze snein

harten trêdzje út it wâld
fûgels sitte op fangraljes
igels sliepe midden oer de dyk

rêstdei op gods ierde
nou wolle guon finen
yn eigen auto nei de tsjerke

[p. 88]

Earewachtynspeksje

bearemûtsen binne bearemûtsen
epauletten binne epauletten
knopen binne knopen
kwasten binne kwasten
koppels binne koppels
sabels binne sabels
learzens binne learzens
en gewearen binne gewearen
twa rigen fan fyftich man
binne hûndert man
gelokkich ien soldaet dy't flau falt

[p. 89]

Poezij is rounom

trije hounekeutels
twa lizzende
en ien rjochtopsteande
wasemjend
yn de iere moarn