Trotwaer. Jaargang 7

[p. 40]

Daniel Daen
Fersen

Forhalding

hwat docht men op sa'n dei
as de sinne skynt troch in noflike sneinswyn?
dan set men de skonken yn biweging ûnder in
lichum yn stân hâlden fan drank en laxantia

fansels helle ik him yn: de âlde tachtiger
trochstroffeljend op trije fuotten
- hie ik mij ynhâlde moatten? -
brune tarflekken ûnder syn eagen
kundigen dea en groet oan: ‘goedemiddag mijnheer’,
ja, hoe groetet men sa'n kontrast werom?
nacht op ljochtskyndei

nou noch, heech yn myn geheime wente
leit syn antlit yn mij útsnijd
soe syn ûnthâld noch ien meter lang west hawwe?

[p. 41]

Kamouflaezje

ik sjoch se
dy't op strjitte rinne, harren broeken ophise
en hounen gewetensleas foar myn doar skite litte

sy sjogge net
hoe't dagen my fan moarnslekken nei joun skouwe
brutsen fan krante, buro en iten
nachts wrot it, wer in dei forsliten
sy sjogge net
de seldsume skientme fan figuer en niget oan myn loarten
folslein ûnskuldich dellein yn in pôt

hwat foar de ruten hinget as fitraezje
tsjinnet mear siele as hûs ta kamouflaezje

[p. 42]

Hjerstrein

wer set in rein dit lân to weak
en oft nou beammen om hwat droechte raze
gjin slûs giet earder op 'e heak
in eazjend stoarmjen sil har wieter blaze