Trotwaer. Jaargang 6

[p. 64]

Bitellet ‘alternatyf’ honoraria???

Literaire tiidskriften bitelje oan de meiwurkers honoraria foar har bijdragen. It is ien fan de kriteria om subsydzje to krijen, fan èn de Provinsje èn CRM. De honoraria kinne je yn twaën skiede:

I. honoraria fan it tiidskrift sels; II. addisjonele honoraria dy't troch CRM bitelle wurde, it Fonds voor de Letteren, meastens in jier nei publikaesje.

Yn novimber/desimber krige ik fan ‘Alternatyf’ twa kear in aksept/girokaert om it abonnemintsjild foar '73 en foar '74 to biteljen, en wol f 17,50 en f 17,50 = f 35, -. Omt ik krektlyn fan Trotwaer hwat jild krigen hie, skeat it my troch de holle dat ik fan ‘Alternatyf’ noch mar ien kear hwat sjoen hie. Ik kaem ta it folgjende rekkensomke:

Alternatyf jrg. 2, nû 5 (sept. '72): side 52, 53, 54 trije fersen fan my;

Alternatyf jrg. 3, nû 2(mrt. '73): side 29, 30, 31 in forhael fan my.

Opteld kaem ik ta 3 fersen en 2¼ siden forhael.

Fan ‘Trotwaer’ krige ik yn '72 foar in fers f 8, -, en yn '73 foar in forhael (standardside fan 400 wurden) f 10, -. Yn desimber bitelle ‘Trotwaer’ it CRM-addisjoneel fan '72: foar in fers wie dat f 10, -.

Omt ek ‘Alternatyf’ subsydzje krijt, foun ik it reëel en freegje ris hoe't it siet mei dy honoraria. De ‘Vereniging Van Letterkundigen’ dert ik lid fan bin, striidt op't lêst net om 'e nocht foar har leden en oaren dy't rjocht op jild hawwe. Boppedat, ik wist it noch fan myn ‘trotwaerredakteurskip’ moat der oan foarwaerden foldien wêze op it flak fan biteljen oan de skriuwers wol it tiidskrift subsydzje krije.

Ik stelde ‘Alternatyf’ út (d.i. Lykle Jansma) om myn abonnemintsjild mar to forrekkenjen tsjin de honoraria. Ik kaem ta dit somke, alles op ‘Trotwaer’-basis: 1972: honorarium 3 fersen = 3 × f 8 = f 24. 1972: addisjoneel honorarium 3 fersen × f 10 makket f 30. 1973: honorarium 2 siden à 400 wurden × f 10 = f 20. Totael: f 74.

Op 26 oktober hie'k f 24 krigen (d.i. honorarium '72), sadat ik noch f 50 hawwe moast. Fan dy f 50 koene de abonnemintsjilden fan '73 en '74 ôflutsen wurde, hwertroch ik noch f 15 fan ‘Alternatyf’ krige.

Oer dy f 15 ha'k skreaun' Stjûr my dêrfoar mar it boek ‘Rein de Foks’ (f 9,50), de rest lit ik dan sitte foar porto, esf.

Nai twa telefoantsjes út Bûtenpost kaem op 16 jannewaris yn myn hûs in brief: nei ûndersteande ynhâld:

Butenpost 10-1-'74

PS.
Ik haw mei de hear Compen fan C.R.M. praet oer de addisjonele talagen en fan him de tasizzing krigen dat pas oer it jier '73 in bitelling hjirfan dien wurde sil fan f 1800, - to fordielen neffens kriteria dy't ik sels stelle kin. Dit bitsjut fansels dat it de iene net safolle opleveret as de oare. It basisbidrach dat ‘alternatyf’ útkeart stiet dêr bûten. Om myn gewisse yn rêst to hâlden haw ik even dyn tousjearre honorarium bisjoen en konstatearre dat it presys neffens it boekje bitelle is. Bliuwst dus noch dyn abonnemintsjild skuldich. It biteljen dêrfan sil ik net freegje omdat dat in point d'honneur wêze moat yn us lytse fryske formidden. It boek Rein de Foks krijst omdat it wizen op bipaelde C.R.M. mooglikheden dat wurdich is. Ik haw dy fan 1 jan. ôf as abonné op it forneamde tydskrift ‘alternatyf’ skrast en hoopje datst der in oare bulte goeds mei dwaen kinste.
LYKLE JANSMA

[p. 65]

Kommintaer:

1.	‘Alternatyf’ krijt oer 1972 gjin addisjoneel; myn birekkening wurdt dan sa: 1972: 3 × f 7 = f 21; 1973: 2 × f 7 = f 14 (om addisjoneel to krijen moat it tiidskrift, neffens it Fonds voor de Letteren, sels op syn minst f 7 de side útkeard hawwe oan de auteur); totael soe ik krije moatte f 35. Der is bitelle f 24: Restant f 11. Dizze f 11 giet op oan ‘Rein en Foks’ en de porto sa't ik skreaun haw.
2.	‘Alternatyf’ kin de f 1800 neffens eigen kriteria fordiele: CRM jowt dit bidrach om oan de skriuwers út to kearen, dêr ha se rjocht op; de 300 siden fan Alternatyf '73 bitsjutte dus in f 6 de side; elke skriuwer kin útrekkenje hwert er rjocht op hat, en dy eigen kriteria moatte je dus mei in kerl sâlt nimme.
3.	It basisbidrach dat ‘Alternatyf’ útkeart, stiet hjir net bûten, hwant der moat al wer neffens it Fonds voor de Letteren (en de Provinsje allyksa) minimael f 7 de side útkeard wurde.
4.	It gewisse fan Lykle Jansma jow'k in stûr foar, it giet my om feiten en ek dy allinne: myn honorarium is presys neffens it boekje seit Jansma. Akkoart Jansma, yn punt 1 hjirboppe stiet de eksakte birekkening (d.i. f 7 de side: Jo hâlde Jo moai oan de easken fan CRM).
5.	Ik soe it abonnemintsjild foar '74 skuldich bliuwe, ad f 17,50: sa kinne je it sjen fansels, mar ik haw foar 1974 noch al rjocht op addisjoneel: yn punt 2 hjirboppe sit ik op f 6 de side, hwat in f 12 meitsje soe; op fiif goune nei wiest dus yn hâlders hân Jansma, en dan dochs mar skrasse?
6.	It boek ‘Rein de Foks’ ha'k mei myn eigen honorarium bitelle (sjoch punt 1); ik soe gjin gunsten fan ‘Alternatyf’ hawwe wolle, boppedat, myn skiljen hie to krijen mei de honoraria foar de skriuwers: dy bipaelde CRM-mooglikheden binne ornearre foar de skriuwers en net foar ‘Alternatyf’.
7.	Je kinne fêststelle dat ‘Alternatyf’ fragenstellende abonnees skrast: ik hoopje net dat se allegearre mei fragen komme, hwant dan bliuwt der gjin tiidskrift mear oer om subsydzje oan to jaen.
8.	Hat elke skriuwer dy't yn '73 skreaun hat yn ‘Alternatyf’ nou honorarium krigen, of moatte se har earst oppenearje? In moaije taek foar it Skriuwersboun, tocht my.
9.	It is saek dat de Fryske literaire tiidskriften ris publisearje hwat se dogge mei de honoraria en mei de addisjonele honoraria: in bulte skriuwers witte net iens dat se earne rjocht op hawwe. As't alles iepen en bleat foar't ljocht komt, wit elk hwert er op rekkenje kin, it kin mei in stimulâns wêze wurk yn to stjûren. Je hoege as skriuwer net to biddeljen om jins jild, en it hoecht de tiidskriften gjin abonnees to kostjen dert se krekt sa'n forlet fan hawwe (sa't se altiten biweare).
10.	Ynteressearden yn dizze matearje kinne materiael oanfreegje by it Fonds voor de Letteren to Den Haag, by de VVL to Amsterdam, en ik nim oan ek by it Frysk Skriuwersboun, dy't úteinlik ek fakboun wêze wol neffens eigen sizzen.

[p. 66]

11.	Skriuwers dy't swierrichheden hawwe mei honoraria y.f.m. ‘Trotwaer’, ‘Alternatyf’ en oare literaire blêdden kinne ek wol mei my kontakt opnimme, binammen as't se net lid binne fan in fakboun.

JOSSE DE HAAN

SCHAGEN, 17-l-'74.

Ach Josse, hwat is der nou wer???

Oan de titel fan it stik fan de Haan soe men hast tinke dat er in great komplot ûntdutsen hie. Mar as men syn rekkensomke sjocht en yn de gaten hat dat it mar om lytse bidragen giet komt men ta de konklusy dat it al wer in stikgoedkeap fjûrwurk is dêr't de Haan sa graech mei boartet.

Foar de lêzer noch even de rekkensom fan de Haan, dy't ik hoe forfelend it ek is, wol even forbetterje moat.

Neffens him hat er trije gedichten yn ‘alternatyf’ hawn en dêrfoar f 24, - krigen. Boppedat hat er noch f 11, - yn to barren.

Dit greate bidrach is dus de reden fan it artikel fan de Haan.

Nou even myn somke

De Haan hat trije gedichten makke en dêrfoar f 24, - krigen. Dat is dus mear as C.R.M. foarskriuwt, lykas de Haan sels ek al seach. Dan hat er yn '73 twa en heale side - rûchwei - skreaun. Dat wurdt dan twa en heal kear acht en dat is f 20, -. Boppedat sil ik de Haan in ekstra honorarium útbitelje fan f 15, -. Hy hat dus noch f 35, - yn to barren. Ik sil net sa lyts wêze om syn abonnemintsjild dêr ôf to rekkenjen. Mar dat jild fan him komt fan C.R.M. en moat noch útbitelle wurde troch dy ynstânsje. Dit jild stiet dus bûten de eksploitaesjekosten fan it tydskrift. De Haan seach yn de akseptgirokaert dy't er dit jier krigen hat dus in goede gelegenheit om boppesteande artikeltsje to skriuwen. Dat er net rekkenje kin hoech ik net mear to demonstrearjen, dat hat er sels al oantoand. As foarfechter fan auteursbilangen soe de Haan bigripe moatte dat it publisearjen fan oarmans brieven nou drekt net it doel, dat er mient nei to stribjen, tsjinnet. Ik forbied de Haan hjirby dan ek it oanbieden fan myn brief oan ‘Trotwaer’ omdat er my dat net frege hat. As er it al docht wol ik f 100, - fan him hawwe omdat dit myn priis is foar in brief dy't ik net iens as kopij oanbean ha. It bidrach wol ik wol stoarte op namme fan de V. V.L. Sa kin Josse de Haan troch myn tadwaen noch in bydrage leverje oan de bilangen fan de auteurs. As foarfechter fan dizze bilangen komt er net sa fier as men sjocht hoe't er mei in oarmans rjochten om springt. Foar de rest fyn ik myn antwurd al fierst to lang. Elkenien dy mient dat er to min krigen hat kin myn adres yn it tillefoanboek fine. Dy't mient dat ‘alternatyf’ to min bitellet skriuwt om myn part in brief nei de minister of forrekt it om noch langer to skriuwen. Sokken hawwe dochs neat to sizzen.

BUTENPOST 21-1-'74

LYKLE JANSMA