Trotwaer. Jaargang 5

[p. 119]

Jehannes Fortuyn
Fersen

Fers 1

hjoed Thinh Thi Van mette
alteast dat hwat de napalm
fan him oerlitten hie
en dat wie net folle

út it kraterlânskip fan syn antlit wei
seach it oersleine rjochtereach
my freegjend oan
wisten wy it net?
it âlde forhael wer

ik sette it nijs mar oan
Scott en Irwin rinne op'e moanne!

ek syn glimk
wie net om oantosjen

[p. 120]

Fers 2

sjoch it jonkje Nguyen
fjouwer jier ha syn roetswarte eachjes
dizze wrâld sjoen
doe ha jim syn gesicht fuortbaernd

sjoch hoe't er hjir
yn in hoekje leit
de holle ûnder syn hannen biskermjend
to let nou
jim hiene sa'n moai skimerlampke
fan syn feltsje meitsje kinnen
foar it sliepkeamerke fan Johny

[p. 121]

Peaske

wachtsje net
oant myn wurden
revolverskotten
wurden binne

wachtsje net to lang
dyn girostrookjes
binne nea foldwaende west
dû silst de rinte
yn bloed útkeare moatte

safolle bloed, wytman

[p. 122]

Studinten

read binne de lippen fan it Kapitael
de studinten
dy kapitalistebern
de nije kapitalisten
Marx en Lenin of Mao
witte se folle mear fan
as wy arbeidersbern
read, read binne hja
de studinten

arbeidersbloed!

[p. 123]

Drs.

dû bist fet wurden
in byforskynsel fan 'e revolúsje?
dik is dyn kop
dochs net dyn fel?

hwat biweecht dyn mûle dochs
moat ik dêrfoar salang op it neikommen
fan dyn biloften wachtsje?
dû sjochst de dingen oars nou?
dyn blik is forrûme?
men fynt in oare filosofy
as de stoel wol noflik sit

ik wit it wol
it hat gjin sin myn praet
dû hast dyn sechjes klear
sels Marx makkest dy ta alibi
dû hast it foarinoar
nou noch in minnares derby

nacht
freon fan eartiids
strider foar in bettere wrâld