Trotwaer. Jaargang 3

[p. 15]

Jelle de Jong/
Gedichten

Astronaut

de bern ha greate pûden oer de holle
en in kistke op 'e rêch
foarsichtich geande oer de moanne
en sûnder folle wurden

hja bin ik of dy't ik wêze woe
in astronaut fûleindich sykjend
nei in nije wrâld
de poëzije as romtepak

as pûde oer de holle

as kistke op de rêch

in soarte bear ûnhândich springend
sûnder folle atmosfear

[p. 16]

Oan B. en W.

ien kear sille wy opstean:

dy't it net rêdde koene
de sûpers en de hoeren
de doomny's en de minsken dy't net leare koene
en de âlde wyfkes dy't allinne bidde kinne
en pe-te-rus en paulus
lazarus en magdalena
in hiel folk

dan trekke wy op nei't stêdhûs
en wy geane op 'e setels sitten
in tsjerke sil der net mear wêze:
hiel de stêd wurdt tsjerke

jim slimste dreamen komme út

Frjemde peaske

- - - en doe't de deaden yn har iepen kisten
my har earmen rikten
en ik wer yn dy oare wrâld wie
dêr 't gjin wetten binne en gjin sûnden
doe wiestou dêr wer
- dyn liif dyn heupen en dyn ûnderguod
dyn swit dyn hierren en dyn wurden -
forrize út 'e dea

en skriemend fear ik dyn skerte yn
en wie wer bern
en boarte mei de kraeltsjes fan dyn broek

hast sûnder erch

[p. 17]

Ek dizze dei

ek dizze dei forlern
de kâlde praetsjes by de trochbraek dy't net komme woe
ek nou wurdt der ôfgryslik sûndig' yn 'e tsjerke:

it rjochte wurd wurdt selden sprutsen

Op karnaval bikeard

doe't hja him tsjin de fuotten skopte
hat hy har dochs mar yn 'e knibbels knypt
it bin de lêste tiden
yn ear en deugd is ek de duvel troud
de hear is by de goddeleazen hjoed
hwant tichteby leit nou de himel
as in kafé:

hy rint der samar yn
en de kastlein is wûnderbliid
dat dizze oer de drompel komt
de ingels sjonge yn 'e juke-box

en bûten yn 'e mist rinne de skiep
forsutere