Trotwaer. Jaargang 3

[p. 64]

Bartle J. Laverman

De flapper I

dan forsjoude er
de brot wer
socht in nije kûle
en bisocht it op 'e nij

hy gnyske om it eangstich fladderjen
oerdwealsk
smoarde er
forbaernde se mei in sels bitocht ritueel

jouns socht er woartels
yn 'e bosk
strúnde ûnder de sliepbeammen
skopte lulk tsjin de stammen

knibbele by syn flappen
en smeke de wyn om nije fûgels
dan kroep er yn syn nêst

[p. 65]

De flapper II

dy jouns
kaem er kermjend
út it bosk
stroffeljend
fierder krûpend
sykjend nei in paed

boppe syn holle
tsierden in pear roeken
om in eachbal

it mantsje bonkel

lyts en mismakke
strúnt er tusken
de stammen
skrabet yn 'e groun
sûcht woartelfocht
laket tsjin de fûgels
of flokt
skopt paddestuollen om
forskûlet him
tusken de blêdden
as er fuotstappen fielt

hy sjocht de sinne kommen
hy heart hoe 't de hôfhounen
tsjin syn moanne balte
syn skaed
falt oer it sân
rint fierder
swimt yn de poelen
as de snie falt
rôllet er him op yn syn hoal
en sliept