Trotwaer. Jaargang 1

Koartehimmen-krisis

Koartehimmen giet oer, Allingawier giet troch. Kausael forbân is der net tusken. It iene forfangt it oare net en it oare wurdt net troch it iene oerstallich makke of leechsûgd.

Lit der gjin twivel oer bistean: ik bin foar Koartehimmen, ik bin tsjin Allingawier. Gastfrijer lju as Woodbrookers binne der net. De keuken is geweldich, de bêdden goed en der binne moaije boskpaedtsjes, en tink derom dat in goed miel, in goed bêd en bosklucht tige heilsum is foar in stik of fjirtjin langteannige skriuwers dy't twa dagen lang harsensskrabje.

Hoe 't immen ynspiraesje opdwaen kin yn dat neakene, sigerige Allingawier is my in riedsel.

Ja, ik bin foar Koartehimmen, ek al is it net mear hwat it west hat, of miskien noait hielendal wurden hwat it wêze moatten hie. Twa dingen ha to Koartehimmen spile: it bleat-literaire en de organisaesje fan 'e literatuer. De Koartehimmengearsitten hawwe my wol stimulearre yn 't earstoan, en 'k leau net dat 'k de iennige bin. Der binne nijsgjirrige petearen fierd oer literaire wurkstikken en ûnderwerpen. De pocketrige mei dêroan fêstkeppele it idé fan in federative útjowerij is to Koartehimmen lansearre. Operaesje Fers is to Koarthimmen berne. To Koartehimmen is foar it earst mûskoppe oer in koperative útjowerij. To Koartehimmen binne de toniellju it iens wurden.

Mar de lêste kearen waerd der tomin (ek to minne) lêsstof oandroegen om in animearre petear mooglik to meitsjen.

Der wie ek tofolle gepraet op 'e kant om. Ik tink oan it útstel-Bylsma om de Tsjerne in redaksjeried fan fortrouwensmannen to jaen dy't soargje moasten foar de kontinuiteit fan 'e wurkredaksje. Ik wist dat Popma der net ôfwizend tsjinoer stie. Sels wie ik foar. Mar, ik hie dat mei Bylsma (J.J.) ôfpraet, ik soe hwat tsjinaskselje. Och hea, dat hoegde net, nimmen wie der foar. Poortinga tan te Smit oer in sit yn 'e redaksje, mar dy forsmiet it fier. (Smit hat lêsten hwat healslachtich praet hawn oer de Tsjerne en Trotwaer ik bin net wiis mei ôfwaeid praet, mar 'k bin der wiis mei dat Jo Smit der al wiis mei is. As Jo Smit de Tsjerne rêdde wollen hie, hie er redakteur wurde moatten.) De jouns ha se in troch elkenien ûndertekene brief mei twa kandidaten oan it redaksje-adres fan de Tsjerne stjûrd. Wy, Popma, Van der Ploeg en ik, hienen gjin bilang by dy kandidaten - wy woenen in pear fan 'e ûndertekeners graech yn 'e redaksje ha. Ik haw doe wol slim de yndruk krigen: de Koartehimmers sille it wol even organisearje, mar in oar moat it útfiere. Op it nou ôfstelde sneinoer soe wer soks pleats ha. Der soe preat wurde oer de útjowerij, yn 't bysûnder de KU. Mar lid-wurde fan 'e KU, of op in oare wize it útjowersbidriuw better organisearje? Ho mar!

[p. 120]

De Allingawiersters sille ek har biswieren ha, oars hienen se net in soarte fan anti-wykein op tou set. Hokker biswieren? Ik haw hwat grútsjen heard oer de leiding: Poortinga soe it net goed dwaen. Of faeks is it mear sa: Poortinga is in ‘âld kearel’ en mei dêrom de lieding net ha. Of is it dit: Poortinga is ‘literair adviseur’ foar de paperbackrige, Poortinga forpartet de sinten fan it Fúf, dat dêrom moat Poortinga de lieding fan Koartehimmen kwyt? Ik wit it net krekt, mar de Allingawiersters sille it al witte moatte as se takom jier Poortinga fan 'e foarsitters-stoel stjitte wolle. En se sille ek mei in bettere kandidaet komme moatte, dy't dan wól foar âld en jong akseptabel is. Of is it it doel âlderein ôf to stegerjen? O, nou, dan gean ik mar mei Poortinga en Smit oan 'e brandewyn.

Ja, ik bin tsjin Allingawier. Foarst it programma: jazz and poetry. Jazz is fijn, Hampton of Goodman. Mar it sil wol op ‘cool’ útdraeije tink, en dan dy dichters der ek noch trochhinne to jengeljen. In lêzing oer de dea fan 'e roman. Fordomd ynspirearjend moat ik sizze.

Mar it slimste: in demonstraesje tsjin Koartehimmen. As de Allingawierster dan safolle better witte hoe't it moat, gean mammachtich nei Koartehimmen en stel oarder op saken. Mar gean net to Allingawier yn in hoekje sitten to snotterjen fan: Ype hat my oantreaun en Jo lûkt my oan 't hier.

Ja, Koartehimmen is deablet troch in gebrek oan goeije lês- en dus petearstof, en troch in tofolle oan frijbliuwend geëamel. Mar jo blieze Koartehimmen gjin nij libben yn troch in oar soarte geëamel, to witten oer ynspraek of demokratsy.

To Koartehimmen telt alline de ynspraek fan it manuskript. En, sorry Allingawiersters, dat sjoch ik by jimme noch net. In bulte drokte en gerop, ja, en in protte ferskes der't jimme sels miskien noch wol hwat ynsjogge.

Sil Koartehimmen op 'e nij hwat wurde, dan sil der yn alle gefallen net wer tiid biskikber steld wurde moatte foar it âldehoeren oer Trotwaer, Sonde, KU, Skriuwersboun of oare organisaesje, hwant dat hat allinne mar forwidering jown.

Jo sille bisykje moatte produktive skriuwers fan in biskaet nivo byelkoar to krijen. Slagget dat, dan kinne der ek minsken útnoege wurde dy't net sa produktyf (maer) binne, mar dy't wol in tige oerdiel oer literatuer hawwe.

My tinkt, wy sille stik foar stik earst marris in pear jier bealigje moatte op in manuskript foar't wy wer in gearsit to Koartehimmen hâlde kinne.