Trotwaer. Jaargang 1

[p. 119]

Oan dy fan 2068.

Lykas de tweintichste ieuwers wolle jimme miskien wolris op in feilige manier kultureel dwaen.

As jimme sa lang net wachtsje kinne - oare jier al is Joast Halbertsma twa hûndert jier dea - soene jimme it ûntstean fan Operaesjes Fers bitinke kinne.

Hawwe jimme allinne mar hwat literairhistoaryske niget oan dizze aksje? Neat net slim.

De Rimen en Teltsjes en it houtsjefabryk, dat bliuwt. De fretfersen binne langendelang al fortard.

Mar dit hâldt oer: jimme kompromitearje jim mei in bitinking nei hûndert jier net.

Sykje it oars yn de allegoaryske stunt. Dat slagget altyt.

De Stichting Operaesje Fers hat op 14 febrewaris 1969 werris in kommuniké útjown. De redaksje skriuwt dêryn:

‘Operaesje Fers’ viert vandaag haar éénjarig jubileum....

De kâns sit der yn, dat O.F. by de Fryske Akademy forkeard op 'e bittinkingslist kommen is.

Tink der dus even om: 16 febrewaris is de dei.

Oan dy fan 1969.

De Fryske Akademy c.q. it Literair Historysk Wurkforbân hat, oars as de Nederlandse Vereniging van Letterkundigen, wegere de dichters, bygelyks dy't trochstrings de gearkomsten fan ‘Koartehimmen’ meimeitsje, to animearjen har wurk yn to stjûren bij Operaesje Fers.

Guon redaksjeleden, heart men dan grútsjen, binne de biwenners fan it Coulonhûs net nei't sin.

Dat kinne jo net frijút sizze fansels. Dat litte jo gewoan rotsje.

As jo dan advys útbringe moatte foar súbsydzje witte jo nearne fan en by de forslachjowing fan de aktiviteiten fan it Wurkforbân forswije jo de ‘operaesje’ deagewoan.

Komme de ‘mannen’ dan werris yn Koartehimmen en lizze se de hiele saek iepen, dan hâlde jo de boat hwat ôf. Biede se frijút har redaksjesitten oan en oerlizze se mei jo, hoe't de opfolging wêze moat, dan stelle jo je hwat frij op.

It sil net bistean.

G.