Tijdschrift voor Nederlandse Taal- en Letterkunde. Jaargang 10

Der wereld loop.

(Medicijnboek Gotha, p. 145.)

Noch den sternen so richtet sik der werlde lop, dat segge ik dich, noch den soven planeten, de also sint geheten: Saturnus, Jupiter, Mars, Sol, Venus, Marcurius, Luna. De erste dach is der sunnen, de planete de hetet sol; de andere is der mane, der planeten luna; de dorde Mars, de verde Marcurius, de vefte Jupiter, de soste Venus, de sevende Saturnus.

Nu merke: in der stunde solis so is gud to sprekende myt vorsten ofte myt heren unde myt hoveschen vrouwen to redende in eren husen. In der stunde lune is dat begin to goden lucke unde to rike dage unde dat sik snel apenbaren schal. In den stunden Marce ofte in den daghen Marce so is gud to stride to tende ofte in den watere to badende unde ok twedracht to makende. In den daghe ofte in der stunde Marcurii is gud to wysschede unde

[p. 160]

ok kindere to der schole to settende, de leren vlitliken. In den daghen ofte in der stunde Jovis so machstu vrede maken unde is gud vor heren to gande. In den daghe ofte in der stunde Veneris so is gud to ovende dat to der leve denet, also myt den vrowen. In deme daghe ofte in der stunde Saturni so is alle dingk to ovende myt der hast dat to allen argen denet unde dat is an den sonnavende. Also machstu in allen dagen unde in allen stunden dy vorseen unde beginnen also hir vorschreven steit; sunder oft eyn wolde eyn expriment maken dat waraftich wesen scholde, de schal weten in wat tid in welker stunde, in welkeme daghe, dat he wete in welkem lichte und in wat planaten in deme mane regneret, unde he en kan anders neyn expriment maken, schriven ofte oven, sunder he sy in enen effen tale der manen.

Utrecht.

j.h. gallée.