Anoniem
Van Reynaert is een groot zaet gebleven
Van Reynaert is een groot zaet
Gebleven, dat dair nu zeer op gaet,
Want men vijnt nu meer Reynaerd -
Al en hebben sy geen rode baerd -
Dan men ye dede hier te voren.
Gerechticheit blijft al verloren.
Trou ende wairheit sijn verdreven.
Ende dair voor is ons gebleven
Ghiericheit, loosheit, hat ende nijt.
Dese hebbent al in hoor bevrijt.
Sy ende hair coninghinne hoverdy
Regneren nu op eerden vri,
Al ist int paeus oft keysers hoff.
Elck pijnt den anderen te steken off
Van sijnre eren ende stemmen
Ende selve myt vordel clymmen,
Mit symonien ofte myt gewelt.
Men kent te hove niet dan gelt.
Tgelt isser meer gemynt dan Got
Ende men doet meer door sijn gebot,
Want wie gelt brenct, is wel ontfaen
Ende sijn begeren sel voort gaen,
Ist aen heren oft aen vrouwen.
Tgelt doet altijt veel ontrouwen
Ende vrouwen scande bejagen
Ende mennich valsch getuuch gedragen.
Oncuuscheit, loosheit ende leckernye
Is nu alt spul onder die clergye.
Ist paeus, keyser, al van Romen,
Sijn al in Reynaerts oord gecomen.
Anoniem, na 1375
Reynaerts historie, hs. B, v. 7674-7703, ed. P. Wackers, Reynaert in tweevoud. II, Delta-Bert Bakker, 2002.
Auteursrechtelijk beschermd