Dit is die tafel vanden Groten Lancfranck
(2015)–Anoniem Dit is die tafel vanden Groten Lancfranck–
Auteursrechtelijk beschermdDat vijfte capitel is vander hanken uter stede ende soe nederwert dats knye voeten ende teenDie jucture vanden hancken ende vanden dyen mach verscheiden in IIII maniren alse inwart ende uutwart ende voerwart ende achterwart. ¶Item som wilen van saken van buten ende somwilen van bynnen. Van bynnen alse van langhe tiden hebbende die humoren daer waert ghevloeyet ende die busse vanden been der hanken vervullet ende die zieke en hevet sy nyet purgeert alse waer by si bliven in die stede ende vertrecken die bijntselen. Ende van node so moet dat dye uut gaen. | |
[Folio 188v]
| |
Ende soet lichte uut gaet, so gaet lichte weder in, mer selden blivet staen. ¶Item van saken van buten alse van vallen off van quessinghe of dier ghelike. ¶Ist dattet eynde der benen vanden dye is uut der busse der hancken in wert, so vintmen een grote bulghe in die liessche ende dat been ende den voet kert opwaert also dattet nyet en mach vergaderen mitten ghesonden been. ¶Ist dattet uutwaert uut is, so vintmen een grote bulghe ende die zieke en mach sin knye nyet opwert keren. ¶Ende ist dattet voerwart uut is, dan en mach die zieke nyet comen mitten teen ter erden. ¶Ende ist dattet achterwart uut is, dan en moghen die teen nyet ter eerden comen mytter hielen. ¶Item in vele maniren brenghet ment weder in ende to punte. Ende van een manire bin ic allene ghewone die ic houde voer die beste conste. ¶Ic legghe een langhe scrode van lijnwade wel breet tusschen beyde den dien also dattet wel een eynde gaet voer by die borst, ende dat ander eynde achter voer by der scouder ende beyde eynden vanden laken of scrode vast ghemaket aen een stijl of calumpe. Ende die zieke legghet op die eerde op een deken. Ende wel uut gestrecket ende alle dat been bewonden vanden die totten voeten myt doeken ende myt scroden. Also datmen die bande ende die scroden latet beneden den voet sinken daermen aen binden mach een zeel of touw. Ende ten voeten sal staen een calumpe daer aen sal wesen een catarol of paleye daer dat zeel ofte touw sal doer gaen. Ende dan sal een man trecken dat zeel ofte corde al suetelike. Ende die meister sal Ga naar voetnoot702 dat been ende dat dye vast stryken ende voeghen teghen die bussen. Ende dan salmen al sachtelike die corde slacken tot dattet weder is in sin proper stede. Ende dat die voeten wel ende effen moghen vergaderen dats een seker teyken dattet weder in sin stede is. Ende dan salment binden ende plasteren. Ga naar voetnoot703 |
|