Dit is die tafel vanden Groten Lancfranck

[LXX] Dat sovende capittel is van quessingen of vondinghe der benen sonder brekinghe. Nota

Het ghevallet somwilen van vallen of van quetsen dat somme moruwe benen bugen sonder breken, als dat cacabeen ende ribben ende in somme kijnderen vanden armen ende vanden dyen. Ist dat het is een cacabeen die meister sal sijn vingher steken in den mont ende duwen uutwert ende buten der up duwen mitter ander hant ghesmeert mit terpentijn of mit pecke ende treckent sachte of. Ende aldus salmen doen in die ribben. Die arm ende die been salmen an die cromme side bijnden een starck spalke. Mer men moet dat lit eerst betten mit water der in is ghesoden camillen, popel°, bismalve°, fenigreet° ende lijnzaet. Ende smeren mit oli van lelien jof mit smoute van gansen jof van

[fol. 142v]

hoenren. Oec is dit guet ende gheprovet dat men legt an die cromme een lemmelen van yvorien jof een yvorien cam, want bider cracht vander yvorien salt been derwert trecken ende weder comen in sijn eerste vorme.