Dit is die tafel vanden Groten Lancfranck

[VIII] Dat IIII capittel is van der cueren van wonden in benen

Als een wonde so deep is int vleisk dattet been is gewont, dan salmen biseen jof dat been al ontwe is gesneden, alsoet somwilen vallet in den benen jof in den armen ende als daer morch uut gaet dat is vrese. Mer een vander beenren der benen ende een vanden beenren van der ermen is dicwijl al en twe gesneden overdwers ende nochtan geneset weder of dat

[fol. 27v]

been is niet al entwe sneden, mer yet vander substancien is verloren. Een generale regule is in die cure der wonden der beenren in sijn gewont, so dat men daer gheen vleisk in sal doen wassen opt been of dat been si eerst volcomeliken gherepareert ende verciert, want dat been mach niet vraliken helen om dattet is vanden twe saden jof ten waer in somme wel jonge kinderen. Mer in die steden der verloren been wasset een reperament datmen heet porus sarcaides jof caro poroides dats herdere dan vleisk ende morwere dan been. Ende ist dattie reperament so is verhert dat het nare is den vorme vanden bene dan vanden vleische, so heetmen porus sarcaides, ende ist contrari so heetment caro poroides. Ende ist datmen vleisk doet wassen up een been niet gherepareert, het sal weder uut breken. Cura: beseet jof dat been al of is gesneden overdwers, dan suldijt vergaderen ende bijndet alsoet wert geseit int veerde capitel volgende. Ende is dattet niet overdwers al ontwe is gesneden, so suldi beseen jof der enich splinter vanden bene vaste clevet an dat gesonde been. Dat suldi weder leden in sijn proper stede jof ghi moget ende helent mitten na volgende pulver. Ende ist dattet al is verscheiden van den gesonden bene, dan suldijt wech werpen ende in die stede suldi maken een reperament mit dese pulvere. Nemet wiroc°, mirre, mastix°, dragantun°, gummi van arabien° van elken II dragmen ende meel van fenigreet° een halve onse. Ende van desen pulver salmen leggen vele up die stede daer ¹¹²

112 Custode in de ondermarge: ‘dat been of is’ (rood en zwart onderstreept).

[fol. 28r]

dat been of is so lang dattet is volcomelike geheelt. Ende alst gherepareert is, dan suldi doen wassen daer dat been is verloren ende dan salmen vleisk daer up doen wassen, alsoet geseit wert int Antidotarie. Wat dat hijr is geseit van wonden van beenren dats van allen benen sonder van beenren vanden hovede, want daer of is een proper capitel bet achter comende.