Strijt van Roncevale


[XV]
Hoe die Sarasinen begonden te vlien ende die meeste capiteyn vanden heyre tot Galifier des conincx neve. DOen riepen die wreede Sarasinen te hant. Help Mameth wat heeft dese felle Rolant Ghedaen den coninck onsen heere Ende heeft oeck ghedoot onsen ioncheere. Coninck Kaerle dien hier heeft ghesant Moet worden gheplaecht van Tervygant Sij en willen ons ruymen tvelt niet Wat dat onser gheschiet Sij hebben den moet seer groot Sij en duchten niet die doot. Ons is veel beter dat wij vlien Eer ons van hem mach erch gheschien. Doen vloden die wreede paijen
[pagina 57]
Die vuyle stinckende prijen. Wel drie duysent datter vloe Die gheschoffiert waren alsoe Dat si niet en souden hebben ghekeert Inden strijt om te sijn onteert. Als dit des conincx opperste heere aensiet Soe en doet hi anders niet Dan hi werpt sinen schilt ter aerden Ende vloot haestelijck sijnder vaerden Daer Galifier des conincx neve was Ghi moecht mi wel ghelooven das Die Sarasinen met hem brochten Litteykenen groot die si wel thoonen mochten Seer luyde te roepen dat si daer begonnen. Rolant ende Olivier hebben ons verwonnen.