Strijt van Roncevale

[XVI]

Hoe Galifier van Baligant ghesonden met .xx. duisent Morianen ende menigerley Sarasinen opten Roncevale quam, ende hoe Olivier ghequetst was. Ende hoe Rolant den horen blies om hulpe van den coninck Kaerle te ghecrighen.

DAer quam wt Ethiopien des coninckx neve
Galifier ende bracht met hem sonder sneven
Veel Mooryanen, want daer af was hi heere
Wel .xxx. dusent oft meere.
Sij waren swert als atrament
Ende vreesseliken ruych als een rent
Haer teeken luyde dat si riepen
Ende met groter wreetheyt si op die kerstenen liepen.

Doen sprack die wijse ridder Olivier.

O vrome kerstenen van herten fier
Elck bestae nu twee hondert man

[p. 58]

 

 

Inden naem Gods ende sinte Iohan.

 

Galifier sadt op een ors seer sterck

 

Dat weerdich was menich merck

 

Hi was een groot overdadich man.

 

Den vromen Olivier reedt hi an

 

Ende stack hem lacen ten rugghe in

 

Dwelck was een anxtelijck beghin

 

Want hem die lancie ten buycke wt quam.

 

Als die wreede Galifier dat vernam

 

Sprack hi, ha kersten du biste gheraect

 

Met u en wort niet veel stridens ghemaect.

 

Dijn coninck liet di qualiken hier.

 

Du lieghes sprack die moedighe ridder Olivier.

 

Antecleer sijn sweert dat hi op hoef

 

Galifieren hi daer mede sloech

[p. 59]

 

Ende cloofde hem al onghespaert

 

Vanden hoofde tot in die middelwaert

 

Het sanck neder dat sweert van stale goet

 

Dattet inden sadel wederstoet.

 

Doen [sprack] van Geneven Olivier.

 

Felle payene leyde moet di gheschien

 

Du en beroemes di nemmermeere

 

Dat ghi den coninck dinen heere

 

Een dachvaert scaden hebste ghedaen

 

Gode lof het is anders met u vergaen.

 

Olivier die was seere ghewont

 

Soe dat hem die doot was kondt

 

Doen riep hi met luder stemmen te hant

 

Sinen gheselle den stouten Rolant.

 

Ay Rolant ik moet u hier ghebreken

 

Sprack Olivier helpet mi wreken.

 

Ay soete gheselle sprack Rolant

 

Daer toe helpe mi God ende sinte Amant

 

O gheselle statet di nu lacen soe

 

Soe en worde ick nemmermeer van herten vroe.

 

Den ghenen diet u heeft ghedaen

 

Wijsten mi ic sal hem hope ic weder slaen.

 

Over hem en wil ick niet claghen

 

Ick hebbe hem selve doot gheslaghen.

 

Doen ghingen si vechten die twee ghesellen.

 

Noyt man en mochte vertellen

 

Sulcke moort als van hem daer was ghewrocht

 

Noyt ridderen en waren soe diere vercocht.

 

Sij streden met vromen ghedochten

 

Soe langhe dat Olivier niet meer en mochte.

 

Doen sprack hi droefliken openbaer.

 

Lieve gheselle Rolant coemt haer

[p. 60]

 

Och wij moeten nu met rouwe druckelijc scheyden.

 

Daer ontvloden die tranen hem beyden

 

Wten ooghen seer haestelike

 

Ende si weenden beyde ontfermelike.

 

Oliviere verseerden sijn wonden

 

Dat bloet ran hem wten monde

 

Hi wert bleeck ende onghedaen

 

Als die ter doot woude gaen

 

Hi viel van flauten in onmacht al te hant.

 

Doen sprack die edel graye Rolant.

 

Wat sal ick doen God almachtich heere

 

Ick bevreese mi dat afsitten seere

 

Want ick soude te voete bliven doot

 

Al en hadde ick anders gheenen noot.

 

Sate ick van desen peerde neder

 

Ick en quamer niet lichtelijc op weder.

 

Ick wil mi haer nu diere vercoopen

 

Ick en wilt ontrijden noch ontloopen.

 

Och mijn lieve gheselle Olivier

 

Moeten wij nu lacen dus scheyden hier

 

Dat is mi ymmer den druckelijcsten dach

 

Dien ick oyt met ooghen aensach

 

Coninck Kaerle verliest heden meere

 

Dat hem grotelijck gaet aen sijn eere.

 

Vanden rouwe die daer hadde Rolant

 

Viel hi in onmachte te hant

 

Maer schier daer na hi weder bequam.

 

Doen sach hi daer ende vernam

 

Dat Olivier ten strijde was ghegaen

 

Die oeck vanden onmacht was op ghestaen.

 

Sijn ooghen die voermaels waren claer

 

Waren nu verdonckert dat is waer

[p. 61]

 

Dwelck scade was ende iammer groot

 

Van Oliviere den edelen ghenoot

 

Nochtans dede hi den Sarasinen groot torment

 

Daer hi ghinc al vechtende blent.

 

Die edel grave Rolant

 

Volchde hem rasschelijc na te hant

 

Ende nam Olivier sinen gheselle ware

 

Onder die sarazijnsche schare

 

Soe langhe tot dat hi vernam

 

Dat hi bi Olivier sinen gheselle quam.

 

Daer gaf hem Olivier eenen slach

 

Want hi hem sekerlijcx niet en sach.

 

Doen sprack die vrome grave Rolant

 

Tot sinen gheselle Olivier te hant.

 

O gheselle berecht doch twij

 

Hebtstu aldus gheslaghen mij

 

Ick ben doch dijn gheselle Rolant.

 

Olivier die antwoerde hier op te hant.

 

Och lacen gheselle ick en sie u niet

 

Och mi is leet dattet is gheschiet

 

Verghevet mi doch doer Gods eere

 

Want het berout mi van herten seere.

 

Doen sprack Rolant tot Olivier

 

Ick vergheeft u eewelijck voer Gode hier.