Strijt van Roncevale

[XIV]

Een goede vermaninghe van den bisschop die hi tot Rolant ende tot alle den kerstenen dede.

DOen sprack die bisschop totten graven Rolant.
O vrome kersten hie van sidij wel bekant
Van dusdanighe groote slaghen
Hier voertijts over menighe dagen

[p. 55]

 

Hier om met rechte dats een ghewarich dinck

 

Soe bemint u Kaerle die coninck.

 

In deser gheliken soude oeck doen

 

Elck goet ridder ende baroen

 

Ende een yeghelijck kersten goet

 

Daer God voer heeft ghestort sijn roode bloet

 

Want die niet en doet alsoe

 

En prijse ick niet weerdich een stroe

 

Maer hi heeft recht die dit doet

 

Ende hem coemt oeck daer af goet

 

Sonderlinge die hem tot Gode keert

 

Ende sijn wet met arbeyde vermeert

 

Weder hi is cleyn oft groot van persoon

 

Hi verdient daer mede dat eewighe loon.

 

Ende sal hem verbliden eewichlijcke

 

Metten enghelen hier boven in hemelrijcke

 

Daer sal hi hooren den soeten sanck.

 

Die dueren sal eewelijck sonder verganck.

 

Sij bidden voer ons ten eewighen tijde

 

Beyde verre ende wijde.

 

Ende die man die dat van te voren weet

 

Dat hem ymmers sijn doot is ghereet

 

Oft ten minsten dat hi wert ghevaen

 

Die moet van noots weghen groote slagen slaen.

 

Om dat die Fransoysen alsoe doen

 

Heetmense vroem ende van daghen coen.

 

DOen vercouverde Marcelijs die coninc weder

 

Ende stack Straelberrengier ter neder.

 

Hi doerstack halsberch ende schilt

 

Dattet niet met allen te gader en hilt

 

Ende werp hem doot ter aerden neder

 

Dat hi noyt op en stont daer na weder.

[p. 56]

 

Noch soe sloech hi Voorne ende Ivone

 

Ende den stouten Gheeraert van Rosselone.

 

Rolant en was hier af niet seer verre

 

Ende riep luyde op hem met moede erre.

 

Leyde moet u gheschien

 

Wel wreede paijen

 

Och met hoe grooten onrechte

 

Slaet ghi dus die edel godsknechten

 

Ende oeck die lieve ghesellen mijne.

 

Dat sal di worden in schijne.

 

Bitterlijcken reedt hi hem doen ane

 

Met eenen wreeden ghedane

 

Hi sloech hem den arm metter schouderen of

 

Dies moeste God hebben lof.

 

Daer na sloech hi met nijde groot

 

Des conincx Marcelijs sone doot.