Strijt van Roncevale

[XIII]

Hoe Rolant die sine beclaechde, ende vander battalien daer Marcelijs ende sijn sone verslagen werden.

DOen oversach die grave Rolant die sine
Die daer laghen in groter pine
Som doot, som leefden si cranckeliken.
Doen sach Rolant herde droeveliken
Ende beclaechde sijn ghesellen seere
Ende bevalse Gode onsen heere
Het was recht hi hadse lief.
In sijn herte hadde hi groot meskief
Ende doer dat sprack hi, ick ben oeck met u
Broeders schuldich te sterven nu
Och wij hebben Kaerlen ghedaen groote eere
Ende van veel landen ghemaect heere
Maer nu verliest hi hier op desen dach
Een schoon gheselscap, dies hi wel claghen mach.
Ay kerstenrijck kerstenrijc ghi sijt seer ontervet
Van goeden bescudders ende bedervet
Ick soude van rouwe bliven doot
Al en hadde ick anders gheenen noot.
Olivier sprack, in wat scaren willen wij slaen
Want ons leven wort cortelijck ghedaen
Wij willen vromelijck bliven in die weere
Ende vromelijck vechten doer Gods eere
Vlien en willen wij in gheender noot
Maer doer Cristus gheloove bliven doot
Den Sarasinen sullen wij ons levende vercoopen

[p. 54]

 

Wij en willent ontrijden noch ontloopen.

 

Daer was beyde berch ende dal

 

Met dooden ridders bespreyt over al

 

Ende die eerde swert, gheworden root van kersten bloede

 

Daer was ghevochten met hooghen moede.

 

Daer laghen ghestroyt sweerden ende schilden

 

Van vromen ridders van herten milde

 

Doe toondese Rolant fier

 

Sinen gheselle Olivier.

 

Och Olivier sprack hi met desen ghesellen

 

Die hier ligghen ende quellen

 

Sijn wij schuldich te bliven doot

 

Het welck is recht ende reden groot

 

Sij en wouden ons in gheender noot begheven

 

Waerom si alle doot sijn ghebleven.

 

O soete Vranckerijck sprack Rolant

 

Hoe seer sidi nu geschant

 

Al verwoest ende onterft

 

Dat ghi onser hebt ghederft.

 

Doen noepte hi sijn peert ende riep Monioye

 

Den fellen Sarasinen te vernoye.

 

Als een ridder vroem ende coene

 

Sloech hi dat hooft af van Francheroene

 

Hi sloecher wel .xx. oft meere

 

Dat alle waren groote sarazijnsche heeren.