Sommighe psalmen ende ander ghesanghen die men in die Christe ghemeynte in dese Nederlanden is gebruyckende


¶ Den Lofsang Zacharie. Luce. 1. DAt doch die Heer si ghemaect groo Israhels Godt si ghepresen Die zijn Volck heeft in angst en noot Besocht, en verlost wt desen En den Hoorn des heyls opgherecht Int Huys van Dauidt zijnen Knecht So hy hadde te vooren Door sine Heylighen Propheten mont Wel voorseyt tot menigher stont Den Vaderen van hem vtuercoren. Dat wi souden wesen beurijt Van der macht onser vyanden En so ghemaeckt zijn nv ter tijt Wt der onghunstigher handen Op dat hy toonde zijn ghoetheyt Onsen Vaderen toegheseyt Dat hi oock is ghedachtich Sijns verbonts en ooc sijns eets voortaen Dien hi Abraham heeft ghedaen Onsen vader in tghelooue crachtich. Dat wy vry zijnde vander hant Der ghener die ons seer haten Hem souden zonder vrees of schant
[fol C2v]
Dienen, en zijn Woort recht vaten Gherechtelick en heylichlick Al ons leuen ghewillichlick Daer toe zijnde gheneghen En ghi mijn Soon sult een Propheet zijn Voor dat aensicht des Heeren mijn Om voor hem te bereyden zijn weghen Dat ghi den Volcke vroech en spaet Sijn salicheyt moecht verconden De welck in zonderheyt bestaet In vergheuing zijner zonden Door Gods ghoetheyt die ons alleyn Heeft als een Son wt tOoste reyn Besocht, en niet vergheten Op dat hy mochte verlichten claer Die in die duyster schadu swaer Des doots, dus langhe hebben gheseten Op dat hy ons voeten met vruecht En onse voet paden mede Rechten mochte in aller duecht Tot zijnen weghen in vrede.