Sommighe psalmen ende ander ghesanghen die men in die Christe ghemeynte in dese Nederlanden is gebruyckende

¶ Die tien Gheboden des Heeren. Exodi int xx.

HEft op v Hert, opent v Oren
Ghi hart volc en traech in tverstaen
Wilt uwes Gods stemme nv hooren
En zijn Gheboden gade slaen.

Ick ben, seyt hi v Godt en Heere

Die v hebbe ghemaect gantsch vry
Van t Jock twelck v beswaerde seere

[fol C1v]

 

Hebt gheen ander Godt neuen my.

 

Laet v gheen Beelt maken noch snijden

 

Van eenich dinck int eertsche dal

 

So ghi die eert teenighen tijden

 

Vwe Godt seer Zeloers sijn sal.

 

Ydelick sijnen naem ghepresen

 

Sult ghi niet nemen inden mont

 

Want hy sal niet onschuldich wese.

 

Dien die misbruyct teenigher stont.

 

Arbeyt ses daghen en met lusten

 

Viert den seuensten, Gods woort smaect

 

Want Godt wilde op dien dach self rusten

 

Vant Werck dat hi hadde ghemaect.

 

Vader en Moeder sult ghi eeren

 

Op dat ghi lang in voorspoet leeft

 

En op eerden seer moecht vermeeren

 

Die v Godt tot een Herberch gheeft.

 

Dootslach en toorne sult ghy mijden

 

Alle Oncusheyt, vliedt en afbreect

 

Steelt niet, al moest ghi ghebreck lijden

 

Gheen Valsch ghetuychnisse en spreect.

 

Van begheeren ghi v ooc sult wachten

 

Des naesten Huys en Wijf nv voort

 

Nae sijn Knecht of vee wilt niet trachten

 

Noch na al dat hem toebehoort.

 

O God v Woort seer groot van machte

 

Luyde claerder dan eenich Metael

 

Gheeft ons die ghenaede ende crachte

[fol C2r]

 

Om dit te houden altemael.