Sommighe psalmen ende ander ghesanghen die men in die Christe ghemeynte in dese Nederlanden is gebruyckende

¶ Dat ghebedt ons Heeren Jesu Christi Math. 6.

Op die Ouerlantsche wijse.

VAder onser in Hemelrijck
Die ons heet Broeders al gelijck
En wilt dat wy dy roepen aen
Als wy met node zijn beuaen
Gheeft dat niet bidt alleyn de mont
Helpt dat het gae van herten gront.

Geheylicht uwen name si

V Woort ongeualst ons bliue bi
Dat wi oock leuen Heylichlick

[fol B4v]

 

Nae uwen name weerdichlick

 

Behoet ons Heer voor valsche leer

 

Dat arm verdoolde volck bekeer.

 

V Rijcke toecomen Vader goet

 

Hier ende hier na uwen trooster soet

 

Gheeft ons so Christus ons toesey

 

Met sinen gaue menigherley

 

Breect Sathans tooren en groot ghewelt

 

Voor zijnercheyt v Kerck verhelt

 

Vwen wil gheschiet o Heer ghelijck

 

Op aerden als in Hemelrijck

 

Gheeft ons gedult in lijdens pijn

 

Ghehoorsaem allesins te zijn

 

Neemt van ons wech vleesch ende bloet

 

Dat teghens uwen wille doet.

 

Gheeft ons huden ons daghelicx broot

 

En wat wy behoeuen ins lijfs noot

 

Behoet ons Heer voor twist en strijt

 

Voor Pest en oock voor dieren tijt

 

Dat wi in goede vrede staen

 

Doet sorge ende Giericheyt van ons gaen.

 

Al onse schult vergheeft ons Heer

 

Dat si ons niet bedroeuen meer

 

So wi oock die ons schuldich zijn

 

Haer schult vergheuen op dit termijn

 

Tot haren dienst maect ons bereyt

 

In rechter liefde en eenicheyt.

 

Leyt ons Heer in becoring niet

[fol C1r]

 

Als ons die boose Gheest strijt hiet

 

Ter rechter oft ter slinckerhant

 

Helpt ons dat wi doen wederstant

 

Int recht betrouwen onbeureest

 

Door uwen trooster den Heylighen geest.

 

Van alle quaden verlost ons meer

 

In dese bedroefde tijden o Heer

 

Beurijt ons vander eewigher doot

 

En troost ons inder lester noot

 

Doet ons altijt goet onderstant

 

Neempt onse sielen in v handt.

 

Amen dat is het werde waer

 

Sterct ons ghelooue wanckelbaer

 

Op dat wi niet en twifelen daer aen

 

Of wi sullen dit al ontfaen

 

Naer uwen wille om Christus naem

 

Door welcken ons bede is ghedaen.