Sommighe psalmen ende ander ghesanghen die men in die Christe ghemeynte in dese Nederlanden is gebruyckende

¶ Den. C.xliij. Psalm.
Domine exaudi orationem.
☞ Hoe dat Dauid in sinen noot God met alder viericheyt, om hulpe, tegen zijn vyanden aengheroepen heeft.

O Heer wilt mijn ghebedt verhooren
Laet comen toch tot uwen ooren
Mijn truerich bidden, dat ick doe
Nae uwe trouwe sonder stooren
En v gherechtigheyt my doet.

Met uwen dienaer wilt niet strijden

Van v oordeel wilt hem beurijden
Dat hi niet comme in grooter pijn
Want gheen Mensch geboren van wijue
Al voor v can gherechtich zijn.

Want mijn vyant heeft my bestreden

Ter neder ghebracht heeft hi mijn leuen

[fol B3v]

 

Noch is hem aldat niet ghenoech

 

[In] eenen duysteren pudt beneden

 

Sluyt hi my, dwelck den doden voecht.

 

Vuaer door mijn siel lijdt grote schaden

 

Mijn hert met weemoet is beladen

 

In dien Pudt heb ick ouerdacht

 

Te mijnen trooste, alle de daden

 

Vwer handen constich ghewracht

 

Daerom ist dat ick claechlick roepe

 

Tot v mijn handen ick opheffe

 

En mijn siel, in haer roepen groot

 

Nae v begeert sonder wanhopen

 

Als [dorre] Lant, na dWater doet.

 

[Haest] v wilt mi behulpigh wesen

 

Den Gheest bestrijt tmi nv mitsdesen

 

Verbercht v aenschijn van mi niet

 

[Anders] so sal ick ghelijck wesen

 

Den gheven diemen int graf schiet

 

Laet nv vroech hooren v goethede

 

Want op v mijn hoop ick bestede

 

En vanden wech die ick houden moet

 

Wilt my rechte kennenschap gheuen

 

Want ick tot v heffe hert en moet.

 

Verlost my Heer door v ghenade

 

[Myner] vyanden, diemy schaden

 

Want ick betrouw v gansch en gaer

 

Ghi zijt mijn hope vroech en spade

 

[Ghy troost] in al mijn lijden swaer.

[fol B4r]

 

Door uwe leere wilt my dringhen

 

Om uwen wille te volbringhen

 

Want ghi alleen mijn recht Godt sijt

 

Maect doch dat uwen Gheest mi brenghe

 

Inden rechten wech met iolijt.

 

Ontslaet my van dit wesen Heere

 

Om dijns weerden naems wille ende eere

 

Verlost mijn heel wt last en noot

 

Door v gherechticheyt alleene

 

Op dat ick v lof make groot.

 

Mijn vianden die my bespringhen

 

Door v goetheyt te niet wilt bringhen

 

En die stracx nae mijn leuen staen

 

Wiltse alle verdoen en verslinden

 

Want ick ben v Knecht onderdaen.