Sommighe psalmen ende ander ghesanghen die men in die Christe ghemeynte in dese Nederlanden is gebruyckende

[fol A2v]

¶ Den tweeden Psalm.
Quare fremuerunt gentes.
☞ Dye Propheet vermaent hoe dat dye Princen des Weerelts met al haer macht Christo ende zijnen gheleden wederstaen zullen, maer dat haer doen so te vergheefs sal wesen, datse van Christo verdaen zullen weesen, ten si datse haer hem ende zijnen woorden onderwerpen.

Op die Ouerlantsche wijse des selfden Psalms.

WAerom ist Volck oproerich eenpaer
Ouerdenckende ydel dinghen
Die Princen en Coninghen alle gaer
Ouer een haren raatslach bringhen
Om te strijden teghen sHeerenhandt
En Christum dien hi heeft ghesandt
Om alle Menschen hulpe

Sy willen wesen onghestraft

En blijuen in boosheyt steken
Dies spreken sy, niet wel bedacht
Laet ons haer banden breken
Laet ons verwerpen haer leringhen al
En leuen nae ons herten gheual
En gheensins daervan wijcken

Maer Godt die in die Hemelen woont

Die salse noch belachen

[fol A3r]

 

Bespotten oock haer bosen gront

 

Ende haeren aenslach beschachen

 

Hy salse met gramschap spreken aen

 

En straffen wat si hebben ghedaen

 

Toornich sal hijse benauwen

 

Ick hebbe v tot een Coninck ghestelt

 

Ouer Syon dat is mijn Kercke

 

Christum, daer de Schriftuer af melt

 

Die ghy nochtans verwerpe

 

Ouer al hi recht vercondighen sal

 

Mijnen sin, en wel gheuallen al

 

En mijnen wille leeren.

 

Hy sprack tot my, ghi zijt mijn Soon

 

Ick hebbe v huyden ghebooren.

 

En voort ghebracht mijns herten croon

 

De Volcken moet ghy vergharen

 

De Heydenen ick v schincken sal

 

Tot eender eruen groot ghetal

 

Die zuldy alle regieren

 

Ghy zultse met uwen woorde voen

 

Haers Vleesch lusten bederuen

 

En mijnen naem haer prijsen doen

 

In alle hoecken der aerden

 

Ghy sult den weder spannighen straf

 

Breken met een Yseren staf

 

En brijselen ghaer als scheruen

 

Hierom ghi Coninghen daer op merct

 

En ghi Rechters laet v leeren

[fol A3v]

 

Ende in desen Coninck v verstercken

 

Sijn Woort houdende in eeren

 

Op dat ghi hem leert vresen wel

 

Oock hem betrout en niemant el

 

Dat is Godt recht wel dienen.

 

Cust doch den Soone vriendelick

 

Dat hy hem niet en vergramme

 

Dat ghi vanden wech niet eewelick

 

Verghaet ontfanckt zijn straffe

 

Als zijnen toorn als vier op ghaet

 

Wel hem die alleen op hem staet

 

Met vast hoop en betrouwen