Sommighe psalmen ende ander ghesanghen die men in die Christe ghemeynte in dese Nederlanden is gebruyckende

¶ Den eersten Psalm.
Beatus vir qui non avijt.
☞ Dye Propheet leert, waer in de salicheit der menschen gheleghen is, salich segghende de ghene, die de Wet des Heeren beherten, in contrarie oock onsalich, die die verachten

Op de Franchoyse wijse der thien Geboden. Leue le cuer. &c.

[fol A2r]

 

SAlich is hi die tot die raden

 

Der boser Menschen niet en ghaet

 

Noch niet blijft in der zondaers paden

 

Niet sidt oock by de Spotters quaet

 

Maer in de Wet van Godt den Here

 

Neemt zijn ghenuechte dach ende nacht

 

Daer in ghedenct tot zijnder leere

 

Hi sal zijn als een Boom gheacht.

 

Ghelijck een Boom by der Reuieren

 

Sijn vruchten gheeft tot zijnder tijt

 

Soo sal certeyn in alle manieren

 

Dees Man oock zijn ghebenedijt.

 

Een Blat en sal niet moghen wijcken

 

Van desen Boom also gheplant

 

So sal hy hebben desghelijcken

 

Gheluck en spoet aen elcken cant.

 

Dit en sal niet moghen gheschieden

 

Den Bosen die Gods woort verschuyft

 

Maer hi sal voor Gods aensicht vlieden

 

Ghelijck voor wint dat caf verstuyft

 

Daerom zullen si niet by den ghoeden

 

Noch in dat Oordel blijuen staen

 

Hier af so wil ons Godt behoeden

 

Beschermen en niet van ons ghaen.

 

Want Godt bekent den wech en dleuen

 

Van die de duecht hanterende zijn

 

Maer die de boosheyt hier aencleuen

 

Haren wech die sal verlooren zijn