Sommighe leerachtighe geestelijcke liedekens

Den 40. Psalm.

Singt met aendacht.

Na dat ick langhen tijt hebbe verwacht
Den wille Gods in mijn ellent,
So heeft hy hem tot my ghewent,
En heeft verhoort in den noot mijne clacht
2 Wt den slijck seer onreyne
En een afgront niet cleyne
Met cracht hy my uytroock
Hy heeft mijn voeten vast

[p. 131]

 

Tot sijn weghen ghepast

 

Op een steenrots seer hooch.

 

3 In mijnen mont heeft hy een lofsanc soet

 

Ghegheven, dies wert hy geeert,

 

Daer door het volck al zijn gheleert,

 

Om den Heer te verwachten met lancmoet.

 

4 Wel salich sal hy wesen,

 

Die hoopt op God ghepresen,

 

End op hem vast blijft staen,

 

Latende hen die stout

 

Lieghen seer menichfout

 

Die haest sullen vergaen.

 

5 Heer God uwe wercken zijn wonderlijc,

 

Ghy denckt op ons Heer goedertier,

 

So dat niemant int leven hier,

 

Vwe gaven can melden sonderlijck.

 

Soud ick die altsaem loven,

 

T'ghetal gaet my te boven,

 

6 Slachtoffer nu voortaen,

 

Laet ick twelck ghy niet wilt,

 

Maer ghy hebt Heere milt

 

D' oore my opghedaen.

 

Schult offer hebt ghy van my begeert niet

 

Voor de sonde: Dan sprack ick vry,

 

Siet hier ben ick, daer staet van my,

 

Gheschreven in u wetboeck, so elck siet

 

8 Dat ick uwen wil heylich

 

Volbrenghen sal ghewillich,

 

Sulcks doe ick oock mijn God,

 

Al u voornemen goet.

[p. 132]

 

Draech ick in mijn ghemoet,

 

End houdt oock u ghebodt.

 

Pause.

 

9 Ick wil verconden u gherechtheyt claer

 

In der ghemeynen overluyt

 

Ghy weet uyt wat hert dat sulcx spruyt

 

10 Ick heb uwe daden gheroemt eenpaer

 

Van u waerheyt stantvastich

 

End van u hulpe crachtich,

 

sprack ick tot groot en cleyn,

 

Ick prijs Heer u goetheyt,

 

End u ghetrouwicheyt

 

Midden in u ghemeyn.

 

11 Vwe goetheyt sult ghy Heer nemmermeer

 

Van my weren tot gheener tijt

 

Maer my bystaen in desne strijt

 

End altijt bewaren tot uwer eer.

 

12 T'cruys wilt my overvallen

 

Ende mijn sonden allen

 

T'ghesichte my ontwijckt,

 

Ick heb meer lijdens stijf,

 

Dan hayren aen mijn lijf,

 

Therte my gantsch beswijckt.

 

13 O God verlost my nu ghenadelijck

 

14 Comt my te hulp o Heer seer haest,

 

Laet doch beschaemt zijn en verbaest

 

al die mijn doot soecken ghestadelijck,

 

15 Datse schande beerven

 

Die my willen bederven,

 

End my bespotten coen

[p. 133]

 

Hen toecome met cracht

 

Datse hadden bedacht

 

My listlijck aen te doen.

 

16 Maer in u zijn sy verheucht en verblijdt

 

Die met noot zijnde seer benout,

 

Op u alleen hebben betrout

 

Datse segghen, God sy ghebenedijt.

 

17 Arm ben ick end ellendich

 

Maer mijn God seer bestendich,

 

Sorcht voor my nu voort aen,

 

Ghy helpt my door u cracht,

 

Ghy hebt oock op my acht,

 

Wilt my altijt bystaen.